परभणी : हॅलो महाराष्ट्र – परभणी जिल्ह्यातील पाथरी तालुक्यात येणार्‍या मर्डसगाव फाटा येथे मोटरसायकल व ट्रक्टर ट्राली यांच्यामध्ये झालेल्या अपघातामध्ये मोटरसायकल वरील एक युवक जागीच ठार तर एक जण गंभीर झाल्याची घटना शनिवार 2 एप्रिल रोजी सकाळी दहा वाजण्याच्या सुमारास घडली आहे. पाथरी आष्टी राष्ट्रीय महामार्ग क्रमांक 222 वर मर्डसगाव पाठीवर सकाळी दहा वाजण्याच्या सुमारास ट्रॅक्टर व दुचाकीचा विचित्र अपघात झाला.
मिळालेल्या माहितीनुसार समृद्धी साखर कारखान्याकडून दोन रिकामे ट्रॉली घेऊन येणारा ट्रॅक्टर क्रं . एमएच 44 डी 2067 मर्डसगावच्या दिशेने मुख्य रस्त्यावरून वळण घेत होता .यावेळी पाठीमागून दोन युवक दुचाकी क्रमांक एमएच 21 बीयु 0888 वर बसून जात होते .दरम्यान याठिकाणी अपघात होत दुचाकीस्वार ट्रॅक्टर ट्रॉलीला धडकले .यात दुचाकीवरील अमोल बालासाहेब काळे (वय 25 )याच्या अंगावर ट्रॉलीचे चाक गेल्याने तो जागीच ठार झाला तर युवराज काळे (वय 24) हा या अपघातात गंभीर जखमी झाला आहे. हे दोघेही निबोंनी ता .घनसांवगी जि .जालना येथील रहिवासी आहेत.
या अपघातानंतर जखमीला पाथरी ग्रामीण रुग्णालय त्यानंतर जालना येथे पुढील उपचारासाठी पाठवण्यात आले आहे .घटनास्थळी पाथरी पोलीस ठाण्याचे पथक पोहोचले होते .बातमी लिहीत असताना पर्यंत पाथरी पोलिस ठाण्यात याप्रकरणी गुन्हा दाखल झाला नव्हता. अपघातातील दोन्ही वाहने पाथरी पोलिस ठाण्यात लावण्यात आली आहेत.