औरंगाबाद – आपण जिच्यावर प्रेम करतो, ती प्रेयसी अनेक दिवसांपासून बोलायला टाळाटाळ करतेय, ही भावना सहन न झाल्याने एका प्रियकराने आत्महत्या केल्याची घटना समोर आली आहे. गुरुवारी रात्री प्रेयसीसोबत फोन सुरु असतानाच त्याने ब्लेडने हातावर सपासप वार करून गळफास लावून आत्महत्या केली. शुक्रवारी सकाळी ही घटना उघडकीस आली. आकाश मिसाळ (22) असे या आत्महत्या केलेल्या तरुणाचे नाव आहे.
याविषयी अधिक माहिती अशी की, औरंगाबादमधील फुलेनगर, उस्मानपुरा येथील आकाश अविवाहित असून तो पेंटर काम करतो. आकाशचे कबीनगर येथील एका 38 वर्षीय महिलेशी प्रेमसंबंध होते. तिला सहा मुलं असून ती महिला भंगार गोळा करण्याचे काम करते. गुरुवारी आकाशने दारूच्या नशेतच प्रेयसीशी फोनवर बोलत असताना हातावर ब्लेडने वार करून घेतले. तसेच रात्री घरातच ओढणीच्या सहाय्याने गळफास लावून आत्महत्या केली. ही बाब शुक्रवारी सकाळी 6 च्या दरम्यान निदर्शनास आली. नातेवाईकांनी पोलिसांच्या मदतीने आकाशला घाटीत नेले, तेव्हा डॉक्टरांनी त्याला मृत घोषित केले.
दरम्यान, सदर महिलेने यापूर्वीही अनेक लोकांना प्रेमाच्या जाळ्यात ओढल्याचा आरोप आकाशच्या नातेवाईकांनी केला आहे. तिने अनेकांना फसवले, पण आमच्या मुलाचा जीव गेला. या प्रकारे आणखी कुणाचा जीव जाऊ नये, यासाठी संबंधित महिलेवर गुन्हा दाखल करण्याची मागणी आकाशच्या आईने केली आहे.