पुणे |समिर रानडे
भारत विकास परिषदेच्या पश्चिम महाराष्ट्र प्रांतातर्फे राष्ट्रीय समुहगान प्रतियोगिता २०१८ ची दुसरी फेरी नुकतीच बीएनसीए सभागृह येथे संपन्न झाली. या स्पर्धेचे आयोजन भारत विकास परिषदेच्या शिवाजीनगर शाखेने केले होते.
या स्पर्धेत बालशिक्षण मंदिर इंग्लिश मिडियम स्कुल, कोथरूड शाळेला विजेतेपद मिळाले आहे. विजेता संघ ७ ऑक्टोबर २०१८ रोजी मुंबई येथे होणार्‍या क्षेत्रीय स्पर्धेत सहभागी होणार आहे. विजेत्या संघाला ट्रॉफी व प्रमाणपत्र देण्यात आले. द्वितीय क्रमांक अशोका युनिव्हर्सल स्कुल, चांसी, नाशिक आणि तृतीय क्रमांक विस्डम हायस्कुल इंटरनॅशनल स्कुल, नाशिक यांना मिळाला.
राष्ट्रभावना वाढीस लागण्यासाठी दरवर्षी आयोजण्यात येत असलेल्या या राष्ट्रीय समुहगान स्पर्धेत पश्चिम महाराष्ट्रातील १६ शाळांचे संघ सहभागी झाले होते. ६ वी ते १० वीचे १६० विद्यार्थ्यांनी यांत सहभाग घेतला. या स्पर्धेत प्रत्येक संघाने हिंदी व संस्कृत भाषेत गाणे सादर केले.