हॅलो महाराष्ट्र ऑनलाईन। (Chhaya Kadam) मराठी कलाविश्वात अत्यंत लोकप्रिय अभिनेत्री छाया कदम सध्या चांगल्याच चर्चेत आहेत. विविध मालिका, चित्रपटांमधून त्यांनी आपल्या अभिनयाची छाप प्रेक्षकांच्या मनावर पाडली आहे. नुकतेच ‘मडगाव एक्स्प्रेस’ या सिनेमात त्यांनी साकारलेली कंचन कोमडी आणि ‘लापता लेडीज’मधील मंजू माई प्रेक्षकांच्या पसंतीस पडली. छाया कदम यांनी आपल्या सहज सुंदर अभिनयाने प्रेक्षकांवर वेगळीच जादू केली आहे. अशातच ‘कान्स’मध्ये त्यांची महत्त्वाची भूमिका असलेल्या ‘ऑल वी इमॅजिन ॲज लाइट’ या भारतीय चित्रपटाला मोठं यश मिळालं. यानंतर अभिनेत्रीने सोशल मीडियावर पोस्ट शेअर करत आनंद व्यक्त केला आहे.
कान्समध्ये भारतीय चित्रपटाचा जलवा
यंदा ७७ वा कान्स चित्रपट महोत्सव पार पडला. दरम्यान, २ दिवसांपूर्वी पायल कपाडिया दिग्दर्शित ‘ऑल वी इमॅजिन ॲज लाइट’ या चित्रपटाला आधी स्टॅण्डिंग ओव्हेशन आणि त्यानंतर मिळालेल्या पुरस्कारामुळे चित्रपटाची संपूर्ण टीम भावुक झाल्याचं पाहायला मिळालं. तब्बल ३० वर्षांनंतर कान्समध्ये ‘ऑल वी इमॅजिन ॲज लाइट’ या भारतीय चित्रपटाने ‘ग्रँड प्रिक्स’ पुरस्कार पटकावला. हा पुरस्कार अत्यंत मानाचा असल्याने सर्वत्र आनंदाचे वातावरण पाहायला मिळत आहे. (Chhaya Kadam) तसेच अनेक कलाकार मंडळी देखील सोशल मीडियाच्या माध्यामातून आनंद व्यक्त करत आहेत. अभिनेत्री छाया कदम यांनीसुद्धा ‘ऑल वी इमॅजिन ॲज लाइट’ने पुरस्कार जिंकल्यावर एक खास पोस्ट शेअर करत आपल्या भावना व्यक्त केल्या आहेत.
छाया कदम यांची पोस्ट (Chhaya Kadam)
मराठी तसेच हिंदी कलाविश्वात आपल्या अभिनयाची छाप पाडणाऱ्या अभिनेत्री छाया कदम यांनी अधिकृत सोशल मीडिया हॅण्डलवर एक पोस्ट शेअर केली आहे. या पोस्टमध्ये त्यांनी कान्समध्ये ‘ऑल वी इमॅजिन ॲज लाइट’ या भारतीय चित्रपटाने ‘ग्रँड प्रिक्स’ पुरस्कार मिळाल्याबद्दल आनंद व्यक्त केला आहे. या पोस्टमध्ये त्यांनी म्हटलंय, ‘आपल्या मातीतल्या आपल्या माणसांची गोष्ट आपल्या वाट्याला येते तेव्हा, तिच्यात जीव ओतून टाकलेला एक – एक क्षण जेव्हा कान्स फिल्म फेस्टिव्हल उजाळून टाकतो, तेव्हा आपल्या मागच्या सगळ्या प्रवासातल्या सगळ्या सिनेमांची – लेखकांची आणि दिग्दर्शकांची आठवण येते’.
पुढे लिहिलंय, ‘कारण त्यांनी त्या त्या वेळेस माझ्यावर दाखवलेल्या विश्वासामुळेच, एक एक पाऊल पुढे पडत हा प्रवास इथपर्यंत येऊन पोहचला आहे. माझ्या आजवरच्या प्रवासातल्या सगळ्यांचे खूप खूप आभार…की, तुमच्यामुळे आज ही छाया इथवर पोहोचली आहे. खूप समाधान – आनंद आणि मन भरून आलं’. (Chhaya Kadam)अशी पोस्ट शेअर करत अभिनेत्री छाया कदम यांनी त्यांच्या चाहत्यांसह कलाकार मित्रमंडळींचेसुद्धा आभार मानले आहेत.