हॅलो महाराष्ट्र ऑनलाईन Corona Cases In Maharashtra । एकीकडे पावसाने संपूर्ण महाराष्ट्रात हाहाकार माजवला असताना दुसरीकडे कोरोना विषाणूने सुद्धा पुन्हा एकदा डोकं वर काढलं आहे. महाराष्ट्रात काल एकाच दिवसांत तब्बल ८६ नव्या कोरोना रुग्णांची भर पडली आहे.त्यामुळे सध्या राज्यात कोरोना रुग्णांची सक्रिय रुग्णसंख्या 383 वर पोहोचली आहे. आत्तापर्यंत ४ रुग्णांना कोरोनामुळे आपला जीव गमवावा लागला आहे. धक्कादायक बाब म्हणजे महाराष्ट्राची आर्थिक राजधानी असलेल्या मुंबईत कोरोना रुग्णांची संख्या सर्वाधिक आहे. त्यामुळे चिंता वाढली आहे.
बुधवारी सापडलेल्या एकूण ८६ रुग्णांपैकी मुंबईत सर्वाधिक 36, त्याखालोखाल पुणे मनपा-9, पिंपरी चिंचवड मनपा-3, ठाणे मनपा-24, कल्याण मनपा -2, नवी मुंबई मनपा 4, पनवेल मनपा 4. नागपूर मनपा , अहिल्यानगर मनपा -2, आणि रायगड मधील एका रुग्णाचा समावेश आहे (Corona Cases In Maharashtra) . जानेवारी 2025 पासून तब्बल 8868 कोरोना चाचण्या करण्यात आल्या. त्यामध्ये एकूण 521रुग्ण कोरोना पॉझिटिव्ह आढळले. त्यातील 132 रुग्ण आत्तापर्यंत बरे झाले आहेत. सध्या महाराष्ट्रातील सक्रिय कोरोना रुग्णांची संख्या 383 आहे. जानेवारी 2025 पासून आजपर्यंत सहव्याधीने ग्रस्त असलेले ३ व इतर असे एकूण ४ रुग्ण दगावले. यापैकी एका रुग्णास नेफ्रोटिक सिंड्रोम सह हायपोकॅल्सिमिक सौझ्झर होते व दुसऱ्या रुग्णाला कॅन्सर होता.
सध्याचे रुग्ण प्रामुख्याने ओमिक्रॉन JN.1 आणि कोरोनाच्या उप-व्हेरिएंट्समुळे (उदा., LF.7, NB.1.8) आहेत, जे अत्यंत संसर्गजन्य मानले जातात, परंतु कमी घातक आहेत. यामध्ये ताप, सर्दी, खोकला, घश्यात खवखव होणे आणि शारीरिक दुखणे अशी लक्षणे दिसतात.
कोरोनाची उत्पत्ती चीनमध्ये – Corona Cases In Maharashtra
खरं तर कोरोनाची उत्पत्ती चीनमध्ये 2019 मध्ये झाली आणि 2020 मध्ये संपूर्ण जगभर हा विषाणू पसरला. भारतात तर करोडो नागरिकांना कोरोनाची लागण झाली होती. अनेकांनी यातून स्वतःचा बचाव केला तर काही रुग्णांना आपला जीव गमवावा लागला. कोरोनाच्या वाढत्या प्रादुर्भावामुळे सगळीकडे लॉक डाउन करण्यात आलं, संपूर्ण जगाची अर्थव्यवस्था ठप्प पडली होती. 2022 पासून जग हळूहळू पूर्वपदावर आले. परंतु आता हाँगकाँग आणि सिंगापूरमध्ये कोरोनाने पुन्हा एकदा डोके वर काढल्यामुळे ही पुन्हा लाट येणार का अशी भीती व्यक्त होत आहे. महाराष्ट्रात कोरोनाच्या या नव्या विषाणूचे रुग्ण सापडल्याने खळबळ उडाली आहे.
