सातारा प्रतिनिधी । सकलेन मुलाणी
सातारा जिल्ह्यातील कोरोना रुग्णांच्या संख्येत आज मोठ्या प्रमाणात वाढ झाली आहे. सकाळी कराड येथे 2 आणि सातारा येथ 1 जण असे एकूण ३ कोरोना पोझिटीव्ह रुग्ण सापडले होते. त्यानंतर दुपारी कराड येथे 12 आणि सातारा येथे 5 असे 17 जण कोरोना बाधित असल्याचे समोर आले. त्यानंतर आता संध्याकाळीही जिल्ह्यात दोन नवे कोरोनाग्रस्त सापडले असल्याची माहिती समोर आली आहे. खावली येथील संस्थात्मक विलगीकरण केलेल्या 18 वर्षीय युवक आणि कराड येथील कोरोना बाधिताचा 59 वर्षीय निकट सहवासित पुरुषाचा अहवाल कोरोना (कोविड-19) बाधित आला आहे, अशी माहिती जिल्हा शल्यचिकित्सक डॉ. आमोद गडीकर यांनी दिली आहे.
सदर 18 वर्षीय कोरोना बाधित युवक हा 27 एप्रिल रोजी विनापरवाना मुंबईहून आला होता. त्याच्यावर पोलीसांनी जागेवर गुन्हा दाखल केला आणि तिथूनच सातारा तालुक्यातील खावली येथे संस्थात्मक विलगीकरणामध्ये त्याला ठेवण्यात आले होते. त्याच्या घशातील स्त्रावाचा नमुना तपासणीसाठी पुणे येथे पाठविण्यात आला होता. हा मुलगा कोरोनाबाधित असल्याचा अहवाल पुणे येथून प्राप्त झाला आहे. तर कराड येथील 59 वर्षीय पुरुष हा कोरोना बाधित व्यक्तीचा निकट सहवासित आहे.
दरम्यान, ताज्या आकडेवारीनुसार सातारा जिल्ह्यातील एकूण कोरोना रुग्णांची संख्या आता 114 वर पोहोचली आहे. यातील तब्ब्ल 85 रुग्ण हे एकट्या कराड तालुक्यात आहेत. तसेच यापैकी उपचार घेत असलेले बाधीत रुग्ण (कोविड-19)- 98, कोरोना मुक्त होवून घरी गेले रुग्ण- 14, कोरोना बाधित मृत्यु झालेले 2 रुग्ण आहेत. आज एकाच दिवशी कराड तालुक्यात एकूण 15 कोरोना रुग्ण सापडले आहेत. तर सातारा येथे आज दिवसभरात एकूण ७ जण कोरोना बाधित सापडले असल्याचे समोर आले. एवढ्या मोठ्या प्रमाणात कोरोना रुग्ण सापडण्याची जिल्ह्यातील हि पहिलीच वेळ असून सातारकरांची हि धोक्याची घंटा समजली जात आहे.
