पुणे | नवसाला पावणारा गणपती म्हणून ख्याती असणाऱ्या श्रीमंत दगडूशेठ गणपतीची आज अंगारकी चतुर्थी निमित्त विशेष पूजा करण्यात आली. अंगारकी निमित्त हजारो भाविकांनी आपल्या लाडक्या दगडूशेठ गणपतीचे दर्शन घेतले. मंदिर परिसर लक्ष लक्ष फुलांनी नंदनवनात बदलून गेला होता.
ब्रँडेड गणपती, व्हीआयपी गणपती अशी प्रसिद्धी असलेला पुण्याचा दगडूशेठ गणपती पुण्याची शान मानला जातो. शहराच्या मध्यमागी असणारे गणपतीचे मंदिर गणेश भक्तांना आकर्षून घेते. या अंगारकी चतुर्थीला फुलांची खास सजावट करण्यात आली होती. घागरीतून पाणी पडते आहे असे दृश्य फुलांच्या साहाय्याने मंदिराच्या शिखरावरती साकारण्यात आले होते.
पहाटेची काकड आरती होऊन मंदिर भक्तांना दर्शनासाठी खुले करण्यात आले. भल्या सकाळी सहा वाजता दर्शन रांग जोगेश्वरी मंदिराला वळसा घालून नगरकर तालीम चौकापर्यंत विस्तारली होती. दुपारी बाराच्या आरतीला तर भक्तांनी मंदिरा समोरील रस्ता व्यापून टाकला होता. दगडूशेठ गणपतीच्या दर्शनाने अंगारकी चतुर्थीच्या उपवासाचे सार्थक भक्तांच्या चेहऱ्यावर पाहण्यास मिळत होते.
दगडूशेठ मंदिराला अंगारकी चतुर्थी निमित्त आकर्षक सजावट
