हॅलो महाराष्ट्र ऑनलाईन| केंद्र सरकारकडून (Central Government) महिलांना आर्थिकदृष्ट्या सक्षम करण्यासाठी विविध योजना राबवल्या जात आहेत. अशाच महत्त्वाकांक्षी योजनांपैकी एक योजना आहे ती म्हणजे ‘ड्रोन दीदी’ (Drone Didi Scheme) योजना. या योजनेद्वारे ग्रामीण महिलांना आधुनिक तंत्रज्ञानाची जोड देऊन त्यांना स्वावलंबी बनवण्याचा प्रयत्न केला जात आहे. तसेच, शेतीसाठी ड्रोनचा उपयोग वाढवून सरकार महिलांना नवीन संधी उपलब्ध करून देत आहे. त्यामुळे आज आपण याच योजनेविषयी जाणून घेणार आहोत.
ड्रोन दीदी योजनेमध्ये देशभरातील स्वयंसहाय्यता गटांमधील (SHG) महिलांना सहभागी होता येणार आहे. या योजनेत केंद्र सरकारकडून महिलांना ड्रोन वापरण्याचे प्रशिक्षण दिले जाणार आहे. तसेच, त्यांनी कृषी क्षेत्रात ड्रोनचा प्रभावी वापर करावा यासाठी प्रोत्साहन दिले जाणार आहे. कीटकनाशके आणि नॅनो-खते फवारणीसाठी ड्रोन अत्यंत उपयुक्त ठरतो. त्यामुळे ही योजना महिलांसाठी आणि शेतीच्या विकासासाठी फायदेशीर ठरेल.
अनुदान आणि आर्थिक मदत
या योजनेअंतर्गत महिलांना ड्रोन खरेदीसाठी आर्थिक मदत करण्यात येणार आहे.
ड्रोन खरेदीसाठी सरकार ८०% सबसिडी देणार आहे, तर जास्तीत जास्त ८ लाख रुपयांपर्यंतचे अनुदान मिळू शकते.
शिल्लक रक्कम भरण्यासाठी महिलांना केंद्रीय कृषी पायाभूत सुविधा निधी (AIF) योजनेअंतर्गत ३% व्याजदराने कर्ज उपलब्ध करून दिले जाणार आहे.
महिलांना १५,००० रुपयांचे प्रोत्साहन अनुदान देखील दिले जाणार आहे.
ड्रोन किटमध्ये काय मिळेल?
या योजनेत सहभागी झालेल्या महिलांना आधुनिक ड्रोन यंत्रणा, चार बॅटरी, चार्जिंग हब आणि ड्रोन नियंत्रित करण्यासाठी आवश्यक उपकरणे दिली जाणार आहेत. त्यामुळे महिला शेतकरी आधुनिक शेतीचा लाभ घेऊ शकतील.
पात्रता आणि अर्ज प्रक्रिया
अर्जदार महिला भारतीय असावी.
स्वयंसहाय्यता गटाचे (SHG) सदस्यत्व आवश्यक आहे.
महिलांच्या नावावर स्वतःची शेती असणे आवश्यक आहे.
वय १८ ते ३७ वर्षे दरम्यान असावे.
आवश्यक कागदपत्रे
अर्ज प्रक्रियेसाठी महिलांना आधार कार्ड, पॅन कार्ड, रहिवासी प्रमाणपत्र, फोन नंबर आणि ईमेल आयडी, पासपोर्ट आकाराचा फोटो आणि SHG ओळखपत्र जमा करावे लागेल.
ड्रोनचा शेतीतील वापर
ड्रोनचा उपयोग प्रामुख्याने नॅनो-खते आणि कीटकनाशक फवारणीसाठी केला जाणार आहे. तसेच, शेतजमिनीची मोजणी आणि निरीक्षण करण्यासाठी देखील याचा उपयोग केला जाईल. यामुळे शेती अधिक प्रभावी आणि किफायतशीर होईल.
