हॅलो महाराष्ट्र ऑनलाईन । राष्ट्रवादी काँग्रेस शरदचंद्र पवार पक्षाचे अध्यक्ष शरद पवार (Sharad Pawar) यांना केंद्रीय निवडणूक आयोगाने मोठा दिलासा दिला आहे. लोकसभा निवडणुकीत शरद पवार गटाला पिपाणी (Pipani Symbol) चिन्हाचा फटका बसला होता, त्यामुळे चिन्हाच्या यादीतून हे चिन्ह वगळावे अशी विनंती शरद पवारांनी निवडणूक आयोगाला केली होती. पवारांची हि विनंती मान्य करत आता केंद्रीय निवडणूक आयोगाने (Election Commission) पिपाणी हे चिन्ह गोठवलं आहे तर शरद पवारांचे तुतारी वाजवणार माणूस हे चिन्ह कायम ठेवण्यात आली आहे.
केंद्रीय निवडणूक आयोगाने राष्ट्रवादी काँग्रेस पक्ष आणि चिन्ह अजित पवार गटाला दिल्यानंतर लोकसभा निवडुकीत शरद पवारांना तुतारी वाजवणारा माणूस हे चिन्ह देण्यात आलं होते. शरद पवारांनी लोकसभा निवडणुकीत तुतारी फुंकत १० पैकी ८ जागांवर दणदणीत विजय मिळवला. मात्र यातील अनेक ठिकाणी पिपाणी चिन्हावर उमेदवार उभे होते. त्यामुळे मतदारांमध्ये संभ्रम निर्माण झाला. अनेक ठिकाणी पवारांची तुतारी समजूनच मतदारांनी पिपाणीला मतदान केलं. दिंडोरी मध्ये पिपाणीला लाखांहून अधिक मते मिळाली. साताऱ्यात तर पिपाणीमुळे राष्ट्रवादी पवार गटाला आपली हक्काची जागा गमवावी लागली. या सर्व कारणांनी पवार गटाकडून पिपाणी हे चिन्ह काढून टाकण्याची विनंती निवडणूक आयोगाकडे करण्यात आली होती.
लोकसभा निवडणुकीत पिपाणी’ या चिन्हामुळे आपलं नुकसान झाल्याचं शरद पवार गटाने म्हटलं होते. लोकसभेची निवडणूक पक्षाने ‘तुतारी वाजवणारा माणूस’ या चिन्हावर लढवली. मात्र या निवडणुकीत काही अपक्ष उमेदवारांना ‘पिपाणी’ चिन्ह देण्यात आलं होतं. यामुळे मतदारांना तुतारी आणि पिपाणी यातील फरक न समजल्यामुळे साताऱ्यात पराभव झाल्याचे पवार गटाने म्हंटल होते, अखेर आज पिपाणी हे चिन्ह गोठवण्याचा निर्णय आयोगाने घेतला आहे. निवडणूक आयोगाच्या या निर्णयानंतर आगामी विधानसभा निवडणुकीत शरद पवारांना मोठा फायदा होणार आहे.