साताऱ्यात कुत्रे दुचाकीच्या आडवे आल्याने महिलेचा पडून मृत्यू

सातारा प्रतिनिधी| शुभम बोडके
मुंबईहून साताऱ्यात बसने आलेल्या महिलेला नातेवाईक दुचाकीवरून घेवून जाताना दुर्घटना घडली आहे. दुचाकीच्या आडवे रस्त्यात कुत्रे आल्याने गाडीवरून पडून महिलेचा मृत्यू झाला आहे. विजया बळीराम भिसे (वय- 43, रा. भांडूप मुंबई) असे मृत महिलेचे नाव आहे.

याबाबत पोलिसांनी दिलेली माहिती अशी की, विजया भिसे या सोमवार (दि. 26) रोजी पहाटे चार वाजता मुंबईहून सातारा बसस्थानकात बसने आल्या होत्या. यावेळी त्यांना नेण्यासाठी त्यांचे नातेवाईक आले. दुचाकीवर पाठीमागे बसून त्या जगदाळे बाग गोडोली येथून जाताना कुत्रे आडवे आले.

दरम्यान, रस्त्यात अचानक कुत्रे आडवे आल्याने विजया या दुचाकीवरून खाली पडल्या. यात त्यांच्या डोक्याला गंभीर दुखापत झाली. त्यांना तातडीने साताऱ्यातील खासगी रुग्णालयात दाखल केले. मात्र, उपचारादरम्यान त्यांचा मृत्यू झाला. या घटनेची नोंद सातारा शहर पोलिस ठाण्यात झाली आहे.