तिसर्‍या तिमाहीत भारताच्या GDP मध्ये झाली 5.4% ची वाढ, ठरलेल्या अंदाजापेक्षा कमी राहिला वेग

नवी दिल्ली । भारत सरकारने GDP ची अधिकृत आकडेवारी जाहीर केली आहे, GDP म्हणजे सकल देशांतर्गत उत्पादन. चालू आर्थिक वर्षाच्या तिसऱ्या तिमाहीत भारताचा GDP 5.4 टक्के दराने वाढला आहे. आकडेवारीनुसार, ऑक्टोबर-डिसेंबर तिमाहीत भारतीय अर्थव्यवस्था 5.4 टक्के दराने वाढली आहे. गेल्या दोन तिमाहींच्या तुलनेत या तिमाहीत GDP चा वाढीचा दर कमी आहे.

चालू आर्थिक वर्षाच्या पहिल्या तिमाहीत GDP 20.1 टक्के होता. दुसऱ्या तिमाहीत GDP वाढीचा दर 7.5 टक्के होता. तिसर्‍या तिमाहीत GDP वाढीचा दर इतर दोन तिमाहींपेक्षा कमी आहे. वाणिज्य मंत्रालयाने जारी केलेल्या आकडेवारीवरून असे दिसून आले आहे की, आठ पायाभूत सुविधा क्षेत्रांमधील वाढही जानेवारीत 3.7% पर्यंत घसरली आहे जी मागील महिन्यात 4.1% होती. औद्योगिक उत्पादन निर्देशांकात आठ प्रमुख उद्योगांचा वाटा 40.27% आहे.

दरम्यान, आर्थिक वर्षाच्या पहिल्या 10 महिन्यांत सरकारची वित्तीय तूट पूर्ण वर्षाच्या अंदाजाच्या 59% एवढी होती, यावरून हे सूचित होते की, सरकार वर्षासाठी GDP च्या 6.9% चे सुधारित वित्तीय तूट लक्ष्य गाठण्याच्या मार्गावर आहे.

मंद विकास दराचे कारण
बरोबर एक वर्षापूर्वी, डिसेंबरच्या तिमाहीत, भारताचा विकास दर 0.40 टक्के होता. या तिमाहीत वाढीचा वेग मंदावला आहे. सांख्यिकी मंत्रालयाच्या मते, आर्थिक वर्ष 2022 मध्ये भारताचा GDP 8.9 टक्क्यांनी वाढण्याची शक्यता आहे. मात्र, आर्थिक वर्ष 2019-20 च्या तिसर्‍या तिमाहीत 6.1% वाढून प्री-कोविड कालावधीपेक्षा अर्थव्यवस्था मजबूत झाली.

GDP
सकल देशांतर्गत उत्पादन (GDP) किंवा सकल देशांतर्गत उत्पन्न (GDI), अर्थव्यवस्थेच्या आर्थिक कामगिरीचे मोजमाप आहे. हे एका वर्षातील सर्व अंतिम वस्तू आणि सेवांचे देशाच्या हद्दीतील बाजार मूल्य आहे. कोणत्याही देशाची अर्थव्यवस्था तेव्हाच चांगली मानली जाते जेव्हा त्याचा GDP चांगला असतो. देशाचा GDP घसरला तर त्या देशाची अर्थव्यवस्था चांगली मानली जात नाही. खराब अर्थव्यवस्थेचा सर्व दोष सरकारला दिला जातो, कारण देशाचे सरकार आपल्या देशाचे आर्थिक धोरण ठरवते.