हॅलो महाराष्ट्र ऑनलाईन । छत्रपती शिवाजी महाराजांनी सूरत कधी लुटलीच नव्हती, असे वक्तव्य राज्याचे उपमुख्यमंत्री देवेंद्र फडणवीस यांनी केल्यानंतर यावर बराच वाद- विवाद झाला. या पार्श्वभूमीवर इतिहास अभ्यासक इंद्रजीत सावंत (Indrajit Sawant) यांनी खरी- खोटी सांगत फडणवीसांना (Devendra Fadnavis) चांगलंच सुनावलं आहे. सुरतेची लूट हे शिवरायांनी मुघलांची अर्थव्यवस्था बिघडवण्यासाठी टाकलेलं पाऊल होते. तुम्ही राजकारणासाठी इतिहास बिघडवू नका असं इंद्रजित सावंत यांनी म्हंटल आहे. याबाबतचा एक विडिओ त्यांनी शेअर केला आहे.
इंद्रजित सावंत यांनी म्हंटल कि, सूरत या शहराला मुघली साम्राज्यात बंदर-ए-मुबारक म्हटले जायचे. सूरत हा मुघली साम्राज्याच्या गालावरचा तीळ आहे, असेही म्हटले जायचे. छत्रपती शिवाजी महाराजांनी 1664 आणि 1670 अशा दोन वेळेस औरंगजेबाचे बंदर असलेल्या सुरतेवर छापा (Surat Loot) टाकला. त्यावेळी शिवाजी महाराजांनी वीरजी व्होरा, हाजी बेग, हाजी सय्यद या बड्या व्यापाऱ्यांना लुटून त्यांच्याकडून प्रचंड मोठी संपत्ती आणली होती. सुरतच्या पहिल्या लुटीवेळी इनायत खान हा सुरतेचा सुभेदार होता. त्याने शिवाजी महाराजांकडे एक दूत पाठवला होता. त्याच्यासोबत इनायत खानाने एक मारेकरी पाठवत शिवाजी महाराजांना धोका दिला. त्यामुळे शिवरायांच्या मावळ्यांनी सुरतेला आग लावून सुरत बेचिराख केली होती, हा आपला इतिहास आहे.
श्री शिवरायानी सुरतेच्या केलेल्या प्रचंड लुटीची खबर औरंगजेबास लाहोर येथे समजली होती! पण नागपूरच्या फडणवीसांना अजून ती उमजलेली नाही!#ChhatrapatiShivajiMaharaj #SackofSurat @Dev_Fadnavis @PawarSpeaks pic.twitter.com/MXYtFDFjSF
— Indrajit Sawant History (@indraswords77) September 1, 2024
सुरतेची लूट हे मध्ययुगातील मुघलांची अर्थव्यवस्था बिघडवण्यासाठी शिवाजी महाराजांनी टाकलेले पाऊल होते. स्वराज्याची अर्थव्यवस्था सक्षम करण्यासाठी या संपत्तीचा वापर करण्यात आला, पण देवेंद्र फडणवीस आता खोटा इतिहास सांगत आहेत. ही त्यांची राजकीय रणनीती असावी. तुम्ही राजकारण करा पण इतिहास बिघडवण्याचे काम करु नका, असे इंद्रजीत सावंत यांनी आपल्या व्हिडीओत म्हटले आहे.
फडणवीस काय म्हणाले होते?
स्वातंत्र्य मिळाल्यानंतर काँग्रेसने शिकवलं की छत्रपती शिवाजी महाराजांनी सूरत लुटली. छत्रपती शिवरायांनी सूरत लुटलीच नाही. उलट सूरतच्या लोकांनी तिथे छत्रपतींचा पुतळा बसवला आहे. तरीही काँग्रेसने शिकवण दिली की छत्रपती शिवरायांनी सूरत लुटली. याची माफी काँग्रेस मागणार का? असं फडणवीस यांनी म्हंटल होते. काँग्रेसवर टीका करताना त्यांनी सुरत लुटीचा मुद्दा काढला होता, मात्र आता खुद्द इतिहासकार इंद्रजित सावंत यांनीच फडणवीस यांचे हे विधान खोदून काढल्यानंतर आता भाजपकडून काय प्रतिक्रिया येते ते पाहायला हवं.