हॅलो महाराष्ट्र ऑनलाईन। (Jolly LLB 3) बॉलिवूड सिनेविश्वातील ‘जॉली एलएलबी’ची सिरीज प्रेक्षकांची प्रचंड लाडकी सिरीज आहे. आतापर्यंत या सिनेमाचे २ भाग येऊन गेले आहेत. पहिल्या भागात अभिनेता अरशद वारसी मुख्य भूमिकेत झळकला होता. तर ‘जॉली एलएलबी २’मध्ये अक्षय कुमार झळकला होता. या दोन्ही चित्रपटांना प्रेक्षकांनी प्रचंड प्रेम दिल्यानंतर आता लवकरच ‘जॉली एलएलबी ३’ प्रेक्षकांच्या भेटीस येत आहे. या सिनेमाची घोषणा झाल्यापासून चित्रपटात कोणता अभिनेता दिसणार? याबाबत चर्चा रंगली आहे. याबाबत आता एक मोठी अपडेट समोर आली आहे.
कोण साकारणार जॉली? (Jolly LLB 3)
जेव्हापासून ‘जॉली एलएलबी ३’ चित्रपटाची चर्चा सुरू झाली तेव्हापासून चाहते म्हणत होते की, पहिल्या दोन्ही चित्रपटातील वकील अर्थात अभिनेता अक्षय कुमार आणि अरशद वारसी यांनाच एखाद्या केसमध्ये समोरासमोर उभे करा. सिनेमा पहायला मजा येईल. अखेर प्रेक्षकांची ईच्छा पूर्ण होणार आहे. होय. आगामी सिनेमा ‘जॉली एलएलबी ३’ मध्ये अभिनेता अक्षय कुमार आणि अरशद वारसी दोघेही एकत्र पाहायला मिळणार आहेत. त्यामुळे खरोखरच या सिनेमात रंगत येणार आहे.
शूटिंगला सुरुवात
‘जॉली एलएलबी ३’ (Jolly LLB 3) या आगामी चित्रपटाच्या शूटिंगला अलीकडेच अजमेरमध्ये सुरुवात झाली आहे. दरम्यान, अभिनेता अक्षय कुमारने त्याच्या अधिकृत सोशल मीडिया हॅण्डल इंस्टाग्रामवर एक मजेशीर व्हिडीओ शेअर करत शूटिंग सुरू झाल्याची माहिती दिली होती. ज्यामध्ये अक्षय आणि अरशद दोघेही आपणच खरे जॉली असल्याचा दावा करताना दिसत आहेत.
एकीकडे अरशद म्हणतो, ‘जगदीश त्यागी उर्फ जॉली, बीए एलएलबी. डुप्लीकेटपासून सावधान’. तर दुसरीकडे अक्षय म्हणतोय की, ‘जगदीश्वर मिश्रा, बीए एलएलबी, ऑरिजिनल जॉली (लखनऊ वाले)’. यानंतर व्हिडीओत सौरभ शुक्ला दिसतात. ज्यांनी दोन्ही चित्रपटांत न्यायाधीश सुंदरलाल त्रिपाठी यांची भूमिका साकारली आहे.
या व्हिडीओत, सौरभ यांच्या हाती एक पाटी दिसतेय. ज्यावर लिहिलंय, ‘जॉली एलएलबी ३’ (Jolly LLB 3) चित्रपटाचं शूटिंग सुरू. यावरून समजतंय की, ‘जॉली एलएलबी ३’मध्ये अक्षय, अरशद आणि सौरभ शुक्ला देखील दिसणार आहेत. पण सिनेमात मात्र खरा जॉली कोण?? यावर वाद होणार का केस ठोकणार? हे पाहणे रंजक ठरणार आहे. या सिनेमाची सिरीज कोर्ट ड्रामावर आधारलेली आहे. पण इतक्या सुंदर पद्धतीने कथानक सादर केले जाते की, प्रेक्षकांना पुढील भागाची प्रतीक्षा करणे भाग पडते. आताही प्रेक्षकांमध्ये ‘जॉली एलएलबी ३’बाबत अशीच उत्सुकता लागली आहे.