सातारा प्रतिनिधी । शुभम बोडके
पाटण येथील दिवाणी व फौजदारी न्यायालयाच्या नवीन इमारतीचे उद्घाटन मुंबई उच्च न्यायालयाचे न्यायमूर्ती के. आर. श्रीराम यांच्या हस्ते नुकतेच करण्यात आले. यावेळी “न्यायालय न्याय मंदिर आहे. लोकांचा न्याय व्यवस्थेवर मोठा विश्वास आहे. या न्याय मंदिरात न्याय देण्याचे काम न्यायाधीश व वकील करत असतात हे काम श्रेष्ठ आहे, असे न्यायमूर्ती के. आर. श्रीराम यांनी म्हंटले.
पाटण येथील न्यायालयाच्या इमारतीच्या उद्घाटन कार्यक्रमास मुंबई उच्च न्यायालयाचे न्यायमूर्ती मिलींद जाधव, प्रमुख जिल्हा व सत्र न्यायाधीश मंगला धोटे, पाटणचे दिवाणी न्यायाधीश क. स्तर प्रथम वर्ग न्यायदंडाधिकारी प्रमोद पाटील, पाटण बार असोसिएशनचे अध्यक्ष ॲङ सुरेश माटेकर आदी उपस्थित होते.
यावेळी के. आर. श्रीराम म्हणाले, न्यायालयात येणाऱ्या प्रत्येक पक्षकारांच्या अडचणी समूजन घ्याव्यात. त्यांचा आदर करुन सहकार्याची भूमिका सदैव ठेवावी. तसेच वकिलांनी न्याय देण्याच्या भूमिकेकडे सामाजिक भावनेतून काम करावे. पाटण येथील इमारत सुंदर आहे. या नवीन इमारतीमुळे न्याय देण्याचे काम नक्की उंचवावेल.
पाटण डोंगरी व दुर्गम भाग आहे. या दुर्गम भागात न्यायालयाच्या नवीन इमारतीचे काम चांगल्या पद्धतीने झाले असून सर्व सोयी-सुविधा देण्यात आल्या आहेत. हे न्यायालय लवकरात लवकर पूर्ण क्षमतेने सुरु करावे. जिल्ह्यात इतर न्यायालयांचे काम सुरु आहे ते लवकरात लवकर पूर्ण होण्यावरही लक्ष केंद्रीत करावे, असे मुंबई उच्च न्यायालयाचे न्यायमूर्ती मिलींद जाधव यांनी सांगितले.
या कार्यक्रमास पोलीस अधीक्षक अजयकुमार बन्सल, पाटणचे तहसीलदार रमेश पाटील, अधिक्षक अभियंता सं.गो. मुंगीलवार, कार्यकारी अभियंता संजय सोनवणे, उपमुख्य कार्यकारी अधिकारी किरण सायमोते, कार्यकारी अभियंता विद्युत मानसिंग शिंदे, न्यायालयीन अधिकारी, वकील, कर्मचारी, नागरिक उपस्थित होते.