खटाव | माण तालुक्यातील माणगंगा नदीपात्रातून वाळू चोरी करणाऱ्या टेम्पोंवर महसूल विभागाने कारवाई केली आहे. वाळूने भरलेला टेम्पों व दोन ब्रास वाळू जप्त केली आहे. या कारवाईनंतर कोतवाल व पोलीस पाटील यांच्या दोन्हीही दुचाकी गाडीची मोडतोड केल्याचे निदर्शनास आले. याप्रकरणी विशाल पोपट माने (रा. हिंगणी), दाजी शरद येडगे (दोघे रा. हिंगणी) व अनोळखी एका म्हसवड पोलीस ठाण्यात गुन्हे नोंद केला आहे.
याबाबत माहिती अशी की, हिंगणीचे कोतवालांना अवैद्य वाळू तस्करीची माहिती फोनवरून मिळताच पोलीस पाटील व कोतवाल यांनी हिंगणीकडे जाणाऱ्या टेम्पोला थांबवण्याचा प्रयत्न केला होता. तेव्हा टेम्पो चालकाने वाहन पळून जाण्याच्या इराद्याने देवापूरकडे गेला. याची संपूर्ण माहिती माणच्या तहसीलदारांना देताच त्यांच्या आदेशानुसार सर्कल ऑफिसर उमरसिंह परदेशी व देवापूरचे तलाठी आनंदा सूर्यवंशी यांनी कालापट्टा देवापूर याठिकाणी जाऊन सदर वाहन ताब्यात घेतले.
माण गंगा नदीतून वाळू चोरीचा धडाका सुरुच आहे. मात्र तहसीलदारांच्या आदेशानुसार महसूल कर्मचाऱ्यांनी वाळू माफियांवर कारवाई करण्यास सुरूवात केल्याने वाळू चोरांचे धाबे दणाणले आहे. कारवाईत उमरसिंह परदेशी व देवापूरचे तलाठी आनंदा सूर्यवंशी, हिंगणीचे पोलीस पाटील व कोतवाल यांनी सहभाग घेतला.