मुंबई | परळ येथील लालबागचा राजा चे दर्शन घेण्यासाठी भाविक दरवर्षी मोठ्या प्रमाणात गर्दी करत असतात. मात्र मंडळाच्या कार्यकर्त्यांकडून भाविकांना नीट वागणूक मिळत नाही अशी दरवर्षीची तक्रार असते. यंदाही असाच प्रकार घडला असून लालबागचा राजा मंडलाच्या कार्यकर्त्यांनी चक्क पोलीसांनाच धक्काबुक्की केल्याने तणाव निर्माण झाला आहे.
दर्शनासाठी रांगेत उभे राहीलेल्या भाविकांना मंडळाच्या कार्यकर्त्यांकडून धक्काबुक्की होते. महीला आणि वृद्ध नागरिकांना याचा त्रास सहन करावा लागतो. नागरिकांच्या मनात मंडळाच्या कार्यकर्त्यांकडून मिळणार्या वाईट वागणूकी बद्दल असंतोष असून बर्याचदा नागरीकांनी त्याविरोधात आवाज उठवत पोलीसांत तक्रार देखील केली आहे.
माजी गृहमंत्री आर. आर. पाटील यांच्या कारकिर्दीत असाच प्रकार घडला असता त्यांनी मंडळाच्या कार्यकर्त्यांना दम भरला होता. तसेच गरज पडली तर मंडळावर गुन्हे दाखल करण्याची तयारी दर्शवली होती.
