रामनवमीच्या दिवशी मुंबईकरांच्या प्रवासाला मोठा अडथळा येणार आहे. मुंबई लोकलच्या विविध मार्गांवर देखभाल आणि अभियांत्रिकी कामांमुळे मेगाब्लॉक घेण्यात येणार आहे, ज्यामुळे प्रवाशांना वेळापत्रकात मोठे बदल दिसतील. चला, जाणून घेऊयात कोणत्या मार्गावर आणि कधी होणार आहेत हे ब्लॉक.
मध्य रेल्वे
मध्य रेल्वेच्या माटुंगा – मुलुंड अप आणि डाऊन धीम्या मार्गावर रविवारी सकाळी 11 ते दुपारी 3.55 वाजेपर्यंत मेगाब्लॉक घेतला जाणार आहे. या वेळेत ब्लॉक असलेल्या मार्गावर शीव, कुर्ला, घाटकोपर, विक्रोळी, भांडुप आणि मुलुंड स्थानकांवर थांबणार असलेल्या गाड्या जलद मार्गावर वळविल्या जातील. विद्याविहार, कांजूर मार्ग आणि नाहूर या स्थानकांवर लोकल सेवा उपलब्ध राहणार नाही.
नेरळ स्थानक
नेरळ स्थानकावर इलेक्ट्रॉनिक इंटरलॉकिंग सुरू करण्यासाठी विशेष ब्लॉक घेतला जाणार आहे, जो सकाळी 8.30 ते दुपारी 2.30 वाजेपर्यंत चालेल. यामुळे बदलापूर – कर्जत दरम्यानची काही लोकल सेवा रद्द केली जातील.
हार्बर मार्गावर ठाणे आणि वाशी / नेरुळ स्थानकांदरम्यान
ठाणे आणि वाशी / नेरुळ स्थानकांदरम्यान ट्रान्स-हार्बर मार्गावर सकाळी 11.10 ते दुपारी 4.10 वाजेपर्यंत मेगाब्लॉक घेतला जाणार आहे. या काळात या मार्गावर सेवा बंद राहणार असल्याने प्रवाशांचा मोठा खोळंबा होईल.
पश्चिम रेल्वे
पश्चिम रेल्वेच्या बोरिवली आणि राम मंदिर स्थानकांदरम्यान रात्रकालीन ब्लॉक घेतला जाणार आहे. हा ब्लॉक शनिवारी रात्री 12.15 ते रविवारी पहाटे 4.15 वाजेपर्यंत असणार आहे, ज्यामुळे काही लोकल सेवांमध्ये बदल होणार आहेत.
अंबरनाथ ते कर्जत लोकल सेवा
मध्य रेल्वेवरील कल्याण – बदलापूरदरम्यान पुलाच्या पायाभूत कामामुळे अंबरनाथ – कर्जत लोकल सेवा शनिवारी रद्द केली जाईल. या कालावधीत लांबपल्ल्याच्या रेल्वेगाड्यांना थांबावे लागणार आहे. हे सर्व ब्लॉक रविवारी मुंबईकरांना मोठा प्रवासविघ्न देणार आहेत, त्यामुळे प्रवाशांना पर्यायी मार्गाचा विचार करणे आवश्यक ठरेल.
