हॅलो महाराष्ट्र ऑनलाइन | डी गॅंग संबंधित जमीन व्यवहार प्रकरणी ईडी कडून अटक करण्यात आलेल्या राष्ट्रवादी काँग्रेसचे नेते आणि राज्याचे अल्पसंख्याक मंत्री नवाब मलिक यांचा पाय आणखी खोलात जाण्याची शक्यता आहे. नवाब मलिक हे पूर्वी डान्सबार चालवायचे. त्यांनी अनेक बांगलादेशी मुलींना भारतात आणून वेश्या व्यवसायात ढकलले होते, असा दावा भाजप नेते मोहित कंबोज यांनी केला आहे.
मोहित कंबोज यांनी पत्रकार परिषद घेत नवाब मलिक यांच्यावर हल्लाबोल केला. नवाब मलिक यांनी बांगलादेशी मुलींना भारतात आणून वेश्या व्यवसायात ढकलले होते, पूर्वीच्या काळी कुर्ल्यातील लोक त्यांना प्रचंड घाबरायचे. मलिक यांचा वेश्या व्यवसाय, ड्रग्ज पेडलिंग आणि देशविरोधी कारवायांशी संबंध आहे. त्यामुळे मुख्यमंत्री उद्धव ठाकरे यांनी त्यांना तात्काळ राजीनामा द्यायला सांगावा, अशी मागणी मोहित कंबोज यांनी केली.
नवाब मलिक यांच्या ईडी चौकशीत त्यांचे अंडरवर्ल्डशी संबंध उघड होतील, असा दावा मोहित कंबोज यांनी केला. मलिक यांच्यानंतर त्यांच्या जावयाचीही पुन्हा चौकशी करावी. आपल्याला देशाविरोधी कारवाई करणारे नेते हवेत आहेत का ?? कोणताही पक्ष, नेता देशापेक्षा मोठा कसा असू शकतो? असा सवाल त्यांनी उपस्थित केला.
