तंत्रज्ञानविश्व | डिजीटल इंडियासाठी गूगलने विकसित केलेल्या ‘Tez’ या अँप्लिकेशनचे लोकप्रिय नाव आजपासून G-Pay असे असणार आहे. यातील इतर फंक्शनमध्ये कुठल्याही स्वरुपातील बदल करण्यात आलेले नसून सद्यस्थितीत फक्त नावामध्ये बदल केलेला आहे. पैशांची देवाणघेवाण, वेगवेगळ्या प्रकारचे रिचार्ज आणि इतर आर्थिक उलाढालींसाठी अत्यंत उपयुक्त असे हे अँप आहे.

पुणे | पुणे मेट्रोच्या मार्गिका २ वनाज ते सिविल कोर्टचे काम प्रगती पथावर असून आनंद नगर येथे लाँचिंग गर्डरची उभारणी अखेरच्या टप्प्यात आहे. यासाठीच्या खांबांची पायाभरणी मोरे विद्यालय पर्यंत पोहचली आहे.

तर कृष्णा हॉस्पिटल जवळील खांबांवर कॅप घातले जात आहेत. सध्या ह्या भागातील कामे प्रगती पथावर असून वाहन चालवतांना कृपया प्रत्येकाने काळजी घ्यावी, असे आदेश पालिका प्रशासनाने दिले आहेत.

मुंबई | जागतिक तापमानवाढीशी सामना करताना महत्वाच्या मानल्या गेलेल्या सौरऊर्जेच्या वापराबाबत लोक अधिक जागरूक होऊ लागले आहेत. महाराष्ट्र सरकारनेही यात पुढाकार घेऊन ब्रेबॉर्न स्टेडियमवर उभारल्या गेलेल्या सोलर प्लांटचे अनावरण सोमवारी केले. मुख्यमंत्री देवेंद्र फडणवीस यांच्या हस्ते या प्लांटचे अनावरण करण्यात आले.

जगात असणाऱ्या सर्व क्रिकेट स्टेडियममधील हा सर्वात मोठा प्लांट आहे. याठिकाणी २२८० सोलर पॅनेल बसविण्यात आले असून याद्वारे ८२० किलोवॅट म्हणजेच तब्बल ११.५ लाख युनिट वीज दरवर्षी तयार करण्यात येणार आहे. वातावरणातील जवळपास ८२५ टन कार्बनचे प्रमाण यामुळे कमी होणार असून याचा मोठा फायदा जागतिक तापमानवाढीशी लढताना होणार असल्याचं मत मुख्यमंत्री देवेंद्र फडणवीस यांनी व्यक्त केलं.

चेन्नई | द्रविड मुनेत्र कळघमच्या अध्यक्षपदी एम के स्टॅलिन यांची निवड झाली आहे. एम करुणानिधी यांच्या मृत्यूनंतर रिकाम्या झालेल्या या जागेसाठी आज पक्षाची साधारण बैठक घेण्यात आली होती. त्यात हा निर्णय घेण्यात आला. स्टॅलिन हे पक्षाचे केवळ दुसरेच अध्यक्ष आहेत. याआधी करुणानिधी यांनी ४९ वर्ष अध्यक्ष म्हणून काम पाहिलं. मागील वर्षी स्टॅलिन यांची पक्षाच्या कार्याध्यक्षपदी निवड झाली होती. २०१९ च्या लोकसभा निवडणूक पार्श्वभूमीवर जयललिता आणि करुणानिधी यांच्या अनुपस्थितीत दोन्ही पक्ष कशी वाटचाल करतात हे पाहणं औत्सुक्याच ठरेल.

मुंबई | राज्यातील वीज वापराबाबत गळती आणि चोरीच्या प्रकरणाला आळा घालण्याऐवजी महावितरणने वीज नियामक मंडळाकडे वीजदरवाढीसाठी याचिका दाखल केली आहे. या याचिकेवर ३१ ऑगस्ट पर्यंत निकाल लागणे अपेक्षित असून निकाल लागला नाही तरी १५ सप्टेंबरपासून किमान ५ ते १०% वीजदरवाढ होण्याची शक्यता आहे. महावितरणाची ३० हजार ८४२ कोटी रुपयांची तूट भरुन काढण्यासाठी हा निर्णय घेण्यात आला आहे. २०१५-१६ सालीच ५ वर्षांसाठी हा प्रस्ताव महावितरणने सादर केला होता. त्यावर काही निर्णय न झाल्याने जुलै महिन्यात पुन्हा फेरयाचिका दाखल करण्यात आली होती.

तुकाराम मुंढे यांच्यावर अविश्वास ठराव

नाशिक | महापालिकेत शिस्तीचे वातावरण, विकासकामांसाठी त्रिसूत्री रचना राबविण्यात पुढाकार घेणाऱ्या तुकाराम मुंढे यांच्या विरोधात भाजपने अविश्वास ठराव दाखल केला आहे. शिवसेनेची मालमत्ता करावरील सूट देण्याची अट मान्य झाल्यास ते तुकाराम मुंढेंच्या समर्थनार्थ काम करतील. १ सप्टेंबर रोजी होणाऱ्या वार्षिक सर्वसाधारण सभेत याबाबत निर्णय घेण्यात येईल. नेहमीप्रमाणे स्थानिक नागरिकांनीही प्रसंगी रस्त्यावर उतरण्याची तयारी दाखवली आहे. नवी मुंबईत भाजप वगळता सर्व पक्षांनी मुंढेंविरोधातअविश्वास ठराव आणला होता. लोकाभिमुख कार्य करण्यात आघाडीवर असलेल्या मुंढेना हटविण्याचा प्रयत्न केल्यास सर्व राजकीय पक्षांविरोधात एकत्र येण्याचा ईशारा ग्राहक पंचायतीचे प्रमुख विलास देवळे यांनी दिला. शहर विकासासाठी मुंढेंसारख्या प्रशासकाची गरज असल्याचं मत सिडकोच्या संचालिका डॉ सरिता औरंगाबादकर यांनी व्यक्त केलं.

पालिका प्रशासनातील अनावश्यक खर्चाला मुंढेंनी चाप लावला आहे, त्यामुळे कामकाजात सुसूत्रता येऊन सकारात्मक बदलही दिसून आले आहेत. त्यामुळे त्यांची गरज आहे असं मत महाराष्ट्र चेंबर ऑफ कॉमेर्सचे अध्यक्ष संतोष मंडलेचा यांनी व्यक्त केलं.

पुणे | घरात आईच्या स्वंयपाककामात मदत करणाऱ्या मुला-मुलींची नेहमी लगबग सुरु असते. त्यांनाही शेफची आवड़ निर्माण व्हावी म्हणून स्वतंत्र कुकिंग स्पर्धेच आयोजन रोटरी क्लबने केलं आहे. लिटल मास्टर शेफ या नावाने घेतली जाणारी ही स्पर्धा ८ ते १४ वयोगटातील लहान मुलांसाठी ही स्पर्धा आहे. नॉन गॅस कुकिंग म्हणजे गॅस न वापरता करता येणाऱ्या पदार्थाची स्पर्धा २ गटात होणार असल्याची माहिती रोटरी हेरिटेजचे अध्यक्ष मोहन चौबळ, सचिव हर्षद बावनकर, दीपा बारटक्के यांनी दिली. या स्पर्धेसाठी आतापर्यंत विविध शाळामधील ८० विद्यार्थ्यांनी नोंदणी केली असून मुंबईतील प्रसिद्ध शेफ तुषार प्रीती देशमुख या स्पर्धेचे विजेते निवडणार आहेत. ही स्पर्धा आम्ही प्रथमच आयोजित करत आहोत.
या स्पर्धेच आयोजन दिनांक १ सप्टेंबर रोजी सकाळी १० ते ५ यावेळेत करण्यात आले आहे. नाव नोंदणी सुरु असुन नोंदणीसाठी ९५५२५४४९६८ या क्रमांकावर संपर्क साधण्याचे आवाहन केले आहे. तसेच या स्पर्धेत सहभागी होण्यासाठी प्रति विद्यार्थी २०० रूपये शुल्क आकारण्यात येणार असल्याची माहितीही संयोजकांनी दिली.

सिंधू अंतिम फेरीत, नीरज चोप्राला भालाफेकीत सुवर्ण

जकार्ता | आशियाई स्पर्धेचा नववा दिवस भारतासाठी संमिश्र राहिला. कांस्यपदक, रौप्यपदक आणि सुवर्णपदक मिळविण्यात भारतीय खेळाडू यशस्वी ठरले. नीरज चोप्रा याने भालाफेकीत ८८.०६ मीटर फेक घेत सुवर्णपदक पटकावले. ही फेक घेत त्याने स्वतःचाच राष्ट्रीय विक्रम मोडीत काढला. १९८२ साली गुरतेज सिंग याने जिंकलेल्या कांस्यपदकानंतर भालाफेकीत भारताचे हे पहिलेच पदक ठरले.

महिलांच्या ३००० मीटर अडथळ्यांच्या शर्यतीत सुधा सिंग हिने कांस्यपदक पटकावले. धरून अय्यासामी याने पुरुषांच्या ४०० मीटर हर्डल क्रीडाप्रकारात कांस्यपदक पटकावले. जपानच्या जागतिक क्रमवारीत २ नंबरला असणाऱ्या अकाने यामागुचीवर उपांत्य फेरीत विजय मिळवत पी.व्ही.सिंधू हिने अंतिम फेरीत धडक मारली. दुसरीकडे उपांत्य फेरीत पराभूत झाल्याने भारताच्या साईना नेहवालला कांस्यपदकावर समाधान मानावे लागले. तिला तैवानच्या ताई तझु यिंगने पराभवाचा धक्का दिला.

महिलांच्या लांब उडी स्पर्धेत नीना वरकिलने उत्तम कामगिरीसह रौप्यपदक मिळवले. नवव्या दिवसखेर भारताची पदकसंख्या ४१ झाली असून टेबल टेनिस, बॅडमिंटन, अॅथलेटिक्स या क्रीडाप्रकारातून आणखी पदके अपेक्षित आहेत.

मुंबई | आरोग्य, पोषण आहार, शिक्षण, कृषि, जलसंधारण, आर्थिक समावेशन, कौशल्य विकास आणि मूळ पायाभूत सुविधा या क्षेत्रातील विविध विकासांच्या कामासाठी नंदूरबार, गडचिरोली, वाशिम आणि उस्मानाबाद या चार जिल्ह्यांना मुख्यमंत्री यांनी १२१ कोटी रुपयांचा अतिरिक्त निधी आज जाहिर केला.

या चार आकांक्षित जिल्ह्यांमधील विकास कामांच्या प्रगतीचा मुख्यमंत्री देवेंद्र फडणवीस यांनी व्हिडिओ कॉन्फरन्सद्वारे आढावा घेतला. या बैठकीला राज्यमंत्री दीपक केसरकर, मुख्य सचिव दिनेशकुमार जैन व इतर अधिकारी वर्ग उपस्थित होता.