हॅलो महाराष्ट्र ऑनलाइन | मुंबईचे माजी पोलीस आयुक्त परमबीर सिंग हेच अँटेलिया प्रकरणाचे मास्टरमाइंड आहेत. मात्र एनआयएकडून परमबीर सिंह यांना वाचवण्यात येत असल्याचा आरोप राष्ट्रवादी काँग्रेसचे नेते आणि अल्पसंख्याक मंत्री नवाब मलिक यांनी केला आहे. नवाब मलिक यांनी प्रसारमाध्यमांशी संवाद साधताना सचिन वझे, परमबीर सिंग प्रकरणावर भाष्य करत भाजपवर निशाणा साधला.
नवाब मलिक म्हणाले, केंद्रीय यंत्रणांचा दुरुपयोग करुन केंद्रातील भाजप सरकार महाविकास आघाडी नेत्यांविरोधात कारवाई करत आहेत. राजकीय विरोधकांना बदनाम करण्याचा प्रयत्न केला जात आहे. अँटेलिया प्रकरणात मुंबईचे माजी पोलीस आयुक्त परमबीर सिंह मास्टरमाईंड असल्याचे समोर आले आहे. एनआयए ला हे माहीत आहे, पण तरीही त्यांना वाचवण्याचे काम केंद्राकडून सुरू आहे.
परमबीर सिंग यांनी ईडीला स्टेटमेंट दिलं आहे. सचिन वाझेला सेवेत घेण्यासाठी मुख्यमंत्री आणि त्यांच्या मुलाचा माझ्यावर दबाव होता, असा आरोप सिंग यांनी केला आहे. अनिल देशमुखांना अडचणीत आणणे किंवा या चार्जशीटच्या माध्यमातून मुख्यमंत्र्यांना बदनाम केले जात आहे. त्यांनी स्टेटमेंट दिलं असेल, पण दिलेलं स्टेटमेंट खरं असतं असं नाही असेही नवाब मलिक यांनी म्हंटल.
