पिंपरी प्रतिनिधी। पुण्यातील हिंजेवाडी परिसरात गुन्हेगारी वारंवार डोके वर काढत आहे. हिंजेवाडी परिसरात मागील काही दिवसांत अनेक अवैध धंद्यांवर कारवाई करण्यात आलीये. आता पुन्हा एक धक्कादायक घटना या परिसरातून समोर आली आहे. मारूंजी येथील कोलते पाटील सोसायटी जवळील मोकळ्या मैदानात अज्ञात व्यक्तीचा मृतदेह आढळून आला आहे. या घटनेने परिसरात दहशतीचे वातावरण निर्माण झाले आहे.
बुधवारी सकाळी या घटनेची माहिती समोर आली आहे. घटनेची माहिती मिळाल्यानंतर पोलीस घटनास्थळी दाखल झाले असून, अद्याप मृत तरुणाची ओळख पटलेली नाही. परंतु दारू पिऊन झालेल्या भांडणात हा खून झाला असल्याची शक्यता वर्तविण्यात येतीय.
मारुंजी येथे मोकळ्या मैदानात एका तरुणाचा मृतदेह असल्याची माहिती हिंजवडी पोलिसांना बुधवारी सकाळी मिळाली. त्यानुसार घटनास्थळी दाखल झालेल्या पोलिसांना एक तरुण रक्ताच्या थारोळ्यात पडलेला दिसून आला. मृतदेहाच्या जवळ बिअरच्या बाटल्या आढळून आल्या आहेत. यामुळे रात्री दारू पिल्यानंतर झालेल्या भांडणातून हा प्रकार घडला असावा, अशी शक्यता पोलिसांनी व्यक्त केली आहे. याबाबत पुढील तपास सुरू आहे.