हॅलो महाराष्ट्र ऑनलाईन। (Santosh Juvekar) आपल्या लाडक्या कलर्स मराठी वाहिनीवरील ‘इंद्रायणी’ मालिका सध्या महाराष्ट्राच्या घराघरांत जाऊन पोहोचली आहे. या मालिकेला प्रेक्षकांचा चांगला प्रतिसाद मिळतो आहे. या मालिकेतील मध्यवर्ती भूमिका इंदू साकारणारी बाल कलाकार सांची भोईर सध्या लक्षवेधी ठरली आहे. प्रेक्षक तिच्यावर प्रेमाचा वर्षाव करताना दिसत आहेत. तसेच अभिनेत्री अनिता दाते आणि संदीप पाठक या मालिकेत आपल्या दमदार अभिनयाने रसिकांना थक्क करत आहेत. यांच्यासह आता मराठी सिनेविश्वाचा लाडका अभिनेता संतोष जुवेकर या मालिकेत महत्वाची भूमिका साकारतो आहे.
मालिकेत उत्कंठावर्धक वळण
कलर्स मराठीवरील ‘इंद्रायणी’ ही मालिका आता उत्कंठावर्धक वळणावर आली आहे. एकीकडे इंदू दिग्रसकर वाड्यात राहायला गेली असून तिथे ती प्रत्येक कठीण परिस्थितीचा सामना करत आहे. तर दुसरीकडे इंदूच्या सतत पाठीशी असलेले तिचे लाडके व्यंकू महाराज यांची तब्येत बिघडत चालली असून इंदूला महाराजांची काळजी लागली आहे. (Santosh Juvekar) एका साधू बाबांनी सांगितल्या प्रमाणे इंदू व्यंकू महाराजांना वाचवण्याकरता मोठी कसोटी पार पाडेल. येत्या १० जूनपासून इंदूचा नवीन प्रवास सुरू होणार. साधू बाबांनी इंदूला जी संजीवनी सांगितली होती इंदू आता त्याच संजीवनीच्या शोधात आळंदीला जाण्याचे ठरवते. पण तिने निवडलेला हा प्रवास खूपच खडतर असणार यात काही शंका नाही.
पाठीराखा म्हणून संतोष जुवेकरची एंट्री (Santosh Juvekar)
पैसे अपुरे असताना आणि कसली माहिती नसताना इंदूचा हा आळंदीचा प्रवास कसा होईल? याशिवाय तिचा हा खडतर प्रवास पूर्ण होईल का? याची उत्तरे आगामी भागात मिळणार आहेत. कारण या प्रवासात आता इंदूचा पाठीराखा म्हणून तिला साथ देण्यासाठी एक दमदार एंट्री झाली आहे. ही एंट्री संतोष जुवेकरची असून तो साकारत असलेली भूमिका मालिकेत विशेष वळण देणारी ठरणार आहे. त्याच्या एंट्रीचा प्रोमो तुफान व्हायरल झाला आहे. त्यामुळे प्रेक्षकांना आता हे दोघे मिळून हा प्रवास कसा पार पाडणार आहेत? याची उत्सुकता लागली आहे.
प्रोमो झाला व्हायरल
सोशल मीडिया इंस्टाग्रामवर कलर्स मराठीच्या अधिकृत हँडलवर ‘इंद्रायणी’ मालिकेचा नवा प्रोमो शेअर केला आहे. ज्यामध्ये संतोष जुवेकरची (Santosh Juvekar) एंट्री पहायला मिळतेय. सोबत कॅप्शनमध्ये लिहिलंय, ‘संजीवनीसाठी इंदूचा आळंदी प्रवास.. पाठीराखा होणार सोबती, भेट ठरणार खास…’.
आता ‘इंद्रायणी’ मालिकेतील इंदूची जबरदस्त इच्छाशक्ती आणि तिचा हा आळंदीचा खडतर प्रवास … इंदूला व्यंकू महाराजांसाठी संजीवनी मिळवून देईल?? तिचं आराध्य दैवत असलेले श्री विठूमाऊली तिला कशी कशी साथ करतील? हे पाहायला मालिकेचे पुढील भाग पहावे लागतील.