कराड प्रतिनिधी | सकलेन मुलाणी
कराड – पाटण मार्गावर असलेल्या विहे गावच्या हद्दीत स्कॉर्पिओ आणि एका टेम्पोचा मोठा अपघात झाला आहे. या दोन्ही वाहनांचे मोठे नुकसान झाले असून स्कॉर्पिओ चालक गंभीर जखमी झाला आहे. तर टेम्पो पलटी तर स्कॉर्पिओचा चक्काचूर झाला असून सदरची घटना गुरूवारी दुपारी 4 वाजण्याच्या सुमारास घडली आहे. अपघातात जखमी स्कॉर्पिओ चालकाचे अमित हिंदुराव शिंदे (रा. पाटण, ता. पाटण) असे नाव आहे.
घटनास्थळावरून मिळालेली व मल्हारपेठ पोलिसांनी दिलेली माहिती अशी, कराड- पाटण मार्गावर कराड बाजूला दुपारी हा अपघात झाला. अपघात मोठ्या वाहनांचा झालेला असून यावेळी समोरासमोर झालेल्या धडकेमुळे मोठा आवाज झाला. स्कॉर्पिओ गाडीचे (क्रमांक MH- 42- H- 9241) पुढील बाजूचा चक्काचूर झाला आहे. तर टेम्पोचेही (MH-09- L-5946) मोठे नुकसान झाले आहे.
विहे गावच्या हद्दीत व कराड आणि पाटण तालुक्याच्या हद्दीवर हा अपघात झाला. जखमीला कराड येथील रूग्णालयात उपचारासाठी दाखल करण्यात आले आहे. तर मल्हारपेठ येथील पो काॅ. वैभव पवार, हेड काॅ. नानासो कांबळे, संभाजी जाधव यांनी घटनास्थळी धाव घेवून मदत केली. तसेच कराड- पाटण मार्गावर खोळंबलेली वाहतूक सुरळीत केली.