टीम, HELLO महाराष्ट्र। स्त्री शिक्षणाचा पाय रचणाऱ्या क्रांतीज्योती सावित्रीबाई फुले यांचे जन्मगाव असलेल्या नायगाव येथे सावित्रीबाई फुले पुणे विद्यापीठ व सातारा जिल्हा प्रशासन यांच्या संयुक्त विद्यमाने दिनांक १७ व १८ डिसेंबर रोजी महिलांसाठी उद्योजगता प्रशिक्षण व व्यक्तिमत्व विकास कार्यशाळा पार पडली.
१७ डिसेंबर २०१९ रोजी प्र-कुलगुरू डॉ. एन एस उमराणी यांच्या हस्ते महात्मा ज्योतिबा फुले व क्रांतीज्योती सावित्रीबाई फुले यांच्या पुतळ्यास पुष्प हार अर्पण करून कार्यशाळेला सुरुवात करण्यात आली. उदघाटन सत्रामध्ये डॉ. उमराणी यांनी महिलांना मार्गदर्शन केले. नायगावच्या विकासासाठी व कौशल्य विकासासाठी सावित्रीबाई फुले पुणे विद्यापीठाच्या वतीने नेहमीच सहकार्य केले जाईल, असे ते म्हणाले.
विद्यापीठाच्या कौशल्य विकास केंद्राचे अतिरिक्त संचालक डॉ (कॅप्टन) सी. एम. चितळे व डॉ. स्मिता सोवनी यांनी उद्योजगता प्रशिक्षण व व्यक्तिमत्व विकास याविषयी मार्गदर्शन केले. दुसऱ्या दिवशी, कौशल्य विकास केंद्राच्या समन्वयक डॉ. पूजा मोरे व श्री. दिलीप ओक यांनी उद्योजगता प्रशिक्षण व व्यक्तिमत्व विकास याविषयी मार्गदर्शन केले. या दोन दिवसीय कार्यशाळेमध्ये नायगाव व परिसरातील ७० महिलांनी सहभाग घेतला. डॉ. चितळे, डॉ पूजा मोरे, श्री. पंकज सवडतकर यांनी कौशल्य विकास केंद्राच्या विभागाच्या वतीने या कार्यक्रमाचे आयोजन केले.