पिंपरी | सतिश शिंदे
हिंजवडीमध्ये अमानुष कृरतेचा कळस करत दोन अल्पवयीन मुलींवर बलात्कार झाल्याचा धक्कादायक प्रकार घडला आहे. ऊसतोड कामगारांच्या दोन अल्पवयीन मुलींवर बलात्कार करण्यात आला असून त्यामधील एका मुलीचा बुधवारी मृत्यू झाला. पोलिसांनी गणेश निकम यासह अल्पवयीन साथीदाराला अटक केली आहे. रविवारच्या या घटनेने परिसरात संतापाची लाट उसळली आहे.
हाती आलेल्या माहितीनुसार, संत तुकाराम साखर कारखान्याचे ऊसतोड कामगार आपल्या पोटाची भूक भागविण्यासाठी सध्या हिंजवडी परिसरात पाल टाकून राहत असून, त्याशेजारीच आरोपी राहत होते. सहावीच्या इयत्तेत शिकणाऱ्या १२ वर्षांच्या या दोन मुली मंदिरापाशी गेल्या. आरोपींनी त्यांना खाऊचे आमिष दाखवले आणि झुडुपामध्ये नेले. त्या ठिकाणी गणेशने दोघींवर, तर त्याच्या साथीदाराने एकीवर बलात्कार केला. दुसऱ्या दिवशी एका मुलीच्या पोटात दुखू लागले म्हणून तिला औंधच्या सर्वोपचार रुग्णालयात नेले असता तपासणीत तिच्यावर बलात्कार झाल्याचे निष्पन्न झाले. ती बोलण्याच्या स्थितीत नव्हती. नंतर ती मुलगी मरण पावली. पोलिसांनी दुसऱ्या मुलीची भेट घेतल्यानंतर हे प्रकरण उघड झालेले आहे.
आरोपींवर बाललैंगिक अत्याचार कायद्यानुसार पोलीसांनी गुन्हा दाखल केले आहे. आरोपी गणेश निकम हा जळगाव जिल्ह्यातील आंचलगाव येथील रहिवासी आहे. न्यायालयाने त्याला २५ सप्टेंबरपर्यंत पोलीस कोठडी सुनावली आहे. त्याचा
साथीदार अल्पवयीन आहे. सामूहिक बलात्काराच्या या घटनेचे तीव्र पडसाद परिसरामध्ये उमटले असून नागरिकांनी संताप व्यक्त केला आहे.