कराड | कराड तालुक्यातील किरपे येथे गेल्या काही दिवसात बिबट्याचा वावर मोठ्या प्रमाणावर वाढला आहे. बिबट्याच्या हल्ल्यात परिसरातील पाळीव कुत्रे तसेच शेळ्यावर मृत्यूचे प्रमाण वाढले आहे. तर शेतात जाणाऱ्या लोकांच्यात भीतीचे वातावरण वाढत चालले आहे. मंगळावारी दि. 25 रोजी सायंकाळी पाच वाजण्याच्या सुमारास शेळीवर बिबट्याने हल्ला करून ठार केल्याची घटना घडली आहे.
किरपे येथे गेल्या तीन- चार दिवसापूर्वी पाच वर्षाच्या मुलावर बिबट्याने हल्ला करून जखमी केले आहे. तर त्यानंतर खडबडून जागे झालेल्या वनविभागाने तातडीने पिंजरा लावला आहे. परंतु वनविभागाला अद्याप बिबट्या जेरबंद करण्यात यश आले नाही. तर दुसरीकडे लोकांना बिबट्या वारंवारं दिसून येत आहे. त्यामुळे वनविभागाचे अधिकारी आणि ग्रामस्थांच्यात अनेकदा वादावादीचे प्रसंग होताना दिसून येत आहेत. मंगळवारी सकाळी 8 वाजण्याच्या सुमारास राजेंद्र चव्हाण यांना दोन बिबट्याचे एकाचवेळी दर्शन झाले आहे.
आज मंगळवारी सायकाळी किरपे येथे कोयना नदीकाठी असलेल्या बाराबायची मळीत शेळीवर बिबट्याने हल्ला करून ठार केले आहे. किरपे येथील कोडींबा कांबळे यांच्या मालकीच्या शेळीवर बिबट्याने हल्ला करून फडशा पाडला. बिबट्याच्या वाढलेल्या हल्ल्यामुळे शेतकऱ्यांच्यात भीतीचे वातावरण आहे. तर ऊसतोड मजूर बिबट्याच्या भीतीने काम करण्यास तयार नाहीत.