सातारा प्रतिनिधी | शुभम बोडके
कोरेगाव तालुक्यातील एका गावात चोरीची घटना समोर आलेली आहे. कोरेगाव – रहिमतपूर या मार्गावर असलेल्या शिरंबे नजीक असलेल्या वेलंग या पुर्नवसित गावात ही चोरी झालेली आहे. या चोरीची तक्रार रहिमतपूर पोलिस ठाण्यात करण्यात आलेली आहे.
गावकऱ्यांनी दिलेली माहिती अशी, कोरेगाव तालुक्यात वेलंग हे पुर्नवसित गाव आहे. या गावाच्या स्मशानभूमीत चोरी झालेली आहे. चक्क या गावातील अग्निकुडाची चोरी झाल्याचा अर्ज पोलिसांना देण्यात आला आहे. याबाबत ग्रामस्थांनी पोलिसांकडे धाव घेतली आहे.
सध्याच्या धावपळीच्या युगात कोण कशा पध्दतीने आणि कोणत्या गोष्टीची चोरी करेल यांचा नेम राहिला नाही. अनेक गावांच्या विहिरी चोरीला गेलेल्या यापूर्वी आपण ऐकले व पाहिले आहे. मात्र आता शिरंबे गावाच्या नजिक असलेल्या वेलंग या गावातील स्मशानभूमीतील अग्निकुड चक्क चोरांनी चोरून नेले आहे. या संदर्भात सरपंच, उपसरपंचासह ग्रामस्थांनी रहिमतपूरचे सहाय्यक पोलीस निरीक्षक गणेश गड यांच्याकडे तक्रारी अर्ज दाखल केला आहे.