सातारा | साताऱ्यातून ट्रक चोरी केल्याप्रकरणी शहर पोलिसांनी तिघांना अटक करून चोरीचा ट्रक जप्त केला. संशयितांमध्ये दोघेजण सातारचे तर एकजण सांगली जिल्ह्यातील आहे. समाधान पांडूरंग हातेकर (वय- 38, रा. मंगळवार पेठ), बशीर मस्जिद शेख (वय- 55, रा. गुरुवार पेठ, सातारा), असिफ राजू शेख (वय- 39, रा. सुतारवाडी, ता. मिरज, जि.सांगली) अशी संशयितांची नावे आहेत.
याबाबत अधिक माहिती अशी, साताऱ्यातील खंडोबाचा माळ येथून 30 जून 2022 रोजी ट्रक चोरून नेल्याप्रकरणी सातारा शहर पोलिस ठाण्यात गुन्हा दाखल झाला होता. पोलिस गेल्या आठ महिन्यांपासून तपास करत होते. मात्र, संशयित पोलिसांना सापडत नव्हता. अखेर शहर पोलिसांना माहिती मिळाल्यानंतर त्यांनी तिघांची उचलबांगडी केली. चोरीची कबुली देऊन संशयितांनी चोरीतील ट्रक पोलिसांना दिला.
पोनि भगवान निंबाळकर, फौजदार अनिल वाघमोडे, सुधीर मोरे, पोलिस आर. व्ही. दळवी, अब्दुल खलिफा, अंबादास केकाटे, संतोष कचरे यांनी कारवाईत सहभाग घेतला.