कराड | पुणे- बंगळूर आशियाई महामार्गावर वारुंजी तालुका कराड गावच्या हद्दीत उड्डाणपुलावर दुभाजकाला धडकून दुचाकीस्वार ठार झाला. शुक्रवारी दुपारी अडीच वाजण्याच्या सुमारास हा अपघात झाला. अपघातानंतर महामार्गावरील वाहतूक काहीकाळ विस्कळीत झाली होती. काकासो पांडुरंग डुबल (वय 45, रा. मुंढे, ता. कराड) असे अपघातात ठार झालेल्या व्यक्तीचे नाव आहे.
याबाबत पोलिसांनी सांगितले की, मुंढे येथील एक जण महामार्गावरून कोल्हापूर बाजूकडून सातारा बाजूकडे निघाला होता. वारुंजी गावच्या हद्दीत उड्डाण पुलावरून जात असताना महामार्गाच्या मध्ये असलेल्या दुभाजकाला धडकून त्याचा अपघात झाला.
अपघाताची माहिती मिळताच पोलीस व महामार्ग देखभाल विभागाचे कर्मचारी त्वरित घटनास्थळी दाखल झाले. त्यांनी नागरिकांच्या मदतीने जखमीला रुग्णालयात हलवले. परंतु उपचारापूर्वीच त्याचा मृत्यू झाल्याचे वैद्यकीय सूत्रांनी सांगितले. घटनेची नोंद कराड शहर पोलिसात झाली आहे. अधिक तपास अपघात विभागाचे प्रशांत जाधव करत आहेत.