आडुळ पाचोड: ओव्हरटेक करीत असताना समोर असलेल्या ट्रकला पाठीमागून दुचाकी धडकल्याने दुचाकीस्वार ठार झाल्याची घटना बुधवारी (ता.9) औरंगाबाद- सोलापूर राष्ट्रीय महामार्गावरील थापटीतांडा
(ता. पैठण) शिवारात घडली.
परमेश्वर दिना राठोड वय 36 वर्षे राहणार पाचेगाव (ता. गेवराई जिल्हा बीड) हे दुचाकी क्रमांक एमएच 23 बीए 7407 ने औरंगाबादहुन पाचेगावकडे जात असताना महामार्गावरील थापटि तांडा शिवारातील गुगळादेवी मंदिर जवळ एका वाहनाला ओव्हरटेक करीत होते. त्यांच्यासमोर चालत असलेल्या ट्रकला पाठीमागून दुचाकी धडकली. यात ते गंभीर जखमी झाले होते. अपघाताची माहिती मिळताच नॅशनल हायवे ऑथरेटी ऑफ इंडिया ची 1033 या रुग्णवाहिकेचे डॉ. महेश जाधव, आत्माराम गाढेकर, रवी गाडे यांनी तात्काळ घटनास्थळी धाव घेऊन जखमींना पुढील उपचारासाठी औरंगाबाद येथे हलिवले.
मात्र रस्त्यातच परमेश्वर राठोड याचा मृत्यू झाला. पाचोड पोलीस ठाण्याचे गोरक्षनाथ कनसे, यांनी घटनास्थळी धाव घेऊन पंचनामा केला. या अपघाताची नोंद पाचोड पोलिस ठाण्यात घेण्यात आली परमेश्वर राठोड याचा साडू आजारी असून त्यांच्यावर औरंगाबाद येथील एका खासगी रुग्णालयात शस्त्रक्रिया करण्यात आलेली आहे.त्यांचा जेवणाचा डबा घेऊन परत येत असताना काळाने त्यांच्यावर घाला घातला त्यांच्या पश्चात पत्नी दोन मुली, एक मुलगा,सहपरिवार असून घरातील कर्ता पुरुष गेल्याने राठोड कुटुंबावर दुःखाचा डोंगर कोसळला आहे.