औरंगाबाद – शहरातील हनुमान नगरातील भरचौकात झालेल्या आकाश राजपूत हत्या प्रकरणात फरार झालेल्या आरोपी तरुणीला नेवासा येथून पुंडलिक नगर पोलिसांनी काल अटक केली आहे. सोनल पवार (23, रा. नेवासा) असे अटक केलेल्या तरुणीचे नाव आहे.
याविषयी अधिक माहिती अशी की, शहरातील हनुमान नगरातील आकाश राजपूत (21, रा. अजिंक्य नगर, गारखेडा) या तरुणाची 8 ऑगस्टच्या मध्यरात्री निर्घृण हत्या करण्यात आली होती. या घटनेमुळे संपूर्ण शहर हादरून गेले होते. आरोपी सोनल पवार ही त्या दिवशी रात्री घटनास्थळी हजर होती. आरोपी ऋषिकेश आणि गणेश ची ती बहिण आहे. आकाशवर हल्ला करण्यासाठी ती चिथावणी देत होती. त्यानंतर घटना झाल्यापासून ती नेवासा येथे पळून गेली होती. सहाय्यक पोलीस निरीक्षक घनश्याम सोनवणे आणि कर्मचाऱ्यांनी तिला नेवासा येथून पकडले आहे.
या खुनात पुंडलिक नगर पोलिसांनी मुख्य आरोपी गणेश तनपुरे, ऋषिकेश तनपुरे, मंगल तनपुरे, संदीप जाधव, राहूल पवार (सर्व रा. हनुमाननगर) यांना घटनेच्या दुसऱ्या दिवशीच बेड्या ठोकल्या होत्या. त्यातच एका अल्पवयीन आरोपीला ताब्यात घेऊन त्याची रवानगी बाल रिमांड होम मध्ये करण्यात आली आहे.