सांगली प्रतिनिधी । प्रथमेश गोंधळे
कुपवाडमधील १७ वर्षीय कोरोनाबाधित तरुणीच्या संपर्कातील 26 जणांचा दुसरा कोरोना चाचणीचा अहवाल गुरूवारी निगेटिव्ह आला. त्यामुळे कुपवाड करांना दिलासा मिळाला. सांगलीमध्ये बांगलादेशातून २६ प्रवासी दाखल झाले असून त्यांना मिरजेतील क्रीडा संकुलात संस्था क्वॉरंटाईन करण्यात आले आहे. गुजरातमधून आलेल्या त्या कोरोनाबाधित महिलेच्या संपर्कातील चौघांंचा अहवाल प्रलंबित असल्याची माहिती जिल्हा शल्यचिकित्सक डॉ संजय साळुंखे यांनी सांगितले.
दुधेभावीत चाळीस वर्षीय व्यक्ती २७ एप्रिल रोजी मुंबई येथून आली होती. त्याच्यामध्ये कोरोनाची लक्षणे असल्याने तपासणी करण्यात आली होती, त्याचा अहवाल पॉझिटिव्ह आला होता. त्यामध्ये संबंधित व्यक्तीची पत्नी पॉझिटिव्ह असल्याचा अहवाल आला होता. तसेच कोरोनाबाधित व्यक्तीच्या कुपवाडमधील मेहुणीची सतरा वर्षीय तरुणीची कोरोना चाचणी घेतली होती, त्या तरुणीचा अहवालही पॉझिटिव्ह आला होता. त्या तरुणीच्या संपर्कातील जवळचे तिघे तसेच अन्य 26 जणांना संस्था क्वारंटाईन केले होते. त्या सर्वांचे बुधवारी स्वॅब घेण्यात आले होते. या सर्व 26 जणांचा कोरोना चाचणीचा अहवाल गुरुवारी निगेटिव्ह आल्याने कुपवाड मधील नागरिकांना दिलासा मिळाला. सरकारने परराज्यात आणि परदेशात अडकलेल्या भारतीय नागरिकांना परत येण्यास मुभा दिली आहे.
मागील काही दिवसापासून परराज्यातील नागरिक देण्यात येत होते. आता विदेशात असलेले भारतीयही परत येऊ लागले आहेत. सांगलीमध्ये बांगलादेशातून तब्बल 26 प्रवासी गुरुवारी दाखल झाले आहेत. राज्य सरकारने विदेशातून येणाऱ्या नागरिकांनाही हॉटेलमध्ये संस्था क्वारंटाईन होण्याची परवानगी दिली आहे, त्यानुसार जिल्हा प्रशासनाने त्यांना हॉटेलमध्ये राहण्यासंदर्भात विचारणा केली होती. मात्र त्यांनी प्रशासनाच्या संस्था क्वारंटाईनमध्ये राहणार असल्याचे सांगितले. त्यामुळे बांगलादेशातून आलेल्या 26 प्रवाशांना मिरजेतील क्रीडा संकुलामध्ये संस्था क्वारंटाईन करण्यात आले आहे. या सर्व प्रवाशांचा 19 रोजी कोरोनाच्या तपासणीसाठी स्वॅब घेेेतले जाणार आहेत.