वलसाड, गुजरात । लॉकडाउनमुळे प्रियकर-प्रेयसींना विरह सहन करावा लागत आहे. त्यांचा संवाद फक्त मोबाइलपुरता उरला आहे. बरेच जण घरी असल्यानं घरच्यांसमोर फोनवर सुखानं बोलताही येत नाही. लॉकडाऊन हा अनेकांसाठी न संपणारा वनवास ठरतं आहे. दरम्यान, काही प्रियकर-प्रेयसींच्या मनात लॉकडाऊनचे नियम मोडत आपल्या जिवलगाला भेटण्याची उत्कट इच्छा तयार होत आहे. रस्त्यावरील पोलीस आणि कोरोना यामुळं काहींनी वेदना सहन करण्याचा निर्णय घेतला आहे तर काही प्रेमवीरांनी जोखीम पत्करत घराबाहेर पडण्याचा पराक्रम केला आहे. असाच एक प्रकार गुजरातमध्ये समोर आला आहे. प्रेयसीला भेटण्यासाठी आतूर असलेल्या एका युवकाने चक्क महिलेचा वेश धारण करुन मध्यरात्री घराबाहेर पडण्याचा पराक्रम केला आहे. टाइम्स ऑफ इंडियाने हे वृत्त दिले आहे.
महिलेचे कपडे घातले म्हणून पोलीस आपल्याला पकडणार नाहीत असे या युवकाला वाटले होते. पण इथेच तो चुकला. गुजरातच्या वलसाडमधील पारडी शहरात ही घटना घडली. मंगळवारी मध्यरात्री पावणेतीनच्या सुमारास पारीयारोडवर बंदोबस्ताला असलेल्या पोलिसांना मोपेडवर एक महिला दिसली. तिेने पंजाबी ड्रेस घातला होता व चेहऱ्याभोवती ओढणी गुंडाळलेली होती.
महिला समजून सुरुवातीला पोलिसांनी दुचाकीला थांबवले नाही. पण दुचाकीवर असलेली तथाकथित महिला पुन्हा तिथे आली तेव्हा पोलिसांनी चौकशीसाठी मोपेड थांबवली. पोलिसांनी इतक्या रात्री बाहेर पडण्याचे कारण विचारले?. त्यावेळी बाईकवर बसलेला युवक आपले बिंग फुटेल या भितीने काही बोलत नव्हता. तो चिन्हाने पोलिसांशी संवाद साधत होता. त्यामुळे पोलिसांचा संशय आणखी बळावला.
अखेर पोलिसांनी त्या महिलेला चेहऱ्यावरुन ओढणी हटवायला सांगितली. तेव्हा सर्व सत्य समोर आले. पोलिसांनी तसेच मुलीच्या पालकांनी पकडू नये, यासाठी मुलीचा वेश धारण केल्याचे युवकाने चौकशीमध्ये सांगितले. पोलिसांनी त्याला अटक केली होती. मंगळवारी संध्याकाळी जामिनावर त्या युवकाची सुटका झाली.
ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”