पाटण | तालुक्यातील दौलतनगर- मरळी कारखाना येथे दोन मोटार सायकलची समोरासमोर भीषण धडक होऊन एक युवक जागीच ठार झाला. तर दोन जण गंभीर जखमी झाल्याची घटना सकाळी अकराच्या दरम्यान घडली. दरम्यान या घटनेची नोंद मल्हारपेठ पोलीस ठाण्यात झाली आहे.
याबाबत पोलिसांनी दिलेल्या माहितीनुसार ः सोमवार दिनांक 31 रोजी सकाळी 11 वाजणेच्या सुमारास कारखाना कॉलेजकडून नवारस्ताच्या दिशेने येणारी आणि नवारस्ता कडून ढेबेवाडीच्या दिशेने भरघाव वेगाने जाणाऱ्या दोन मोटार सायकलींची दौलतनगर येथे समोरासमोर जोरदार धडक झाली. ही धडक इतकी भीषण होती की, या घटनेत दुचाकी वरील तिघे युवक शेजारील रस्त्याकडेला उभ्या असणाऱ्या ऊसाच्या ट्रॅक्टरवर जाऊन जोरदार धडकले. यामध्ये प्रविण प्रताप पवार (वय- 18, रा. मुळगाव ठोमसे, सध्या चोपदारवाडी ता. पाटण) हा युवक जागीच ठार झाला. तर हर्षद धनाजी भिसे(वय- 18 रा.नाडे), रोहन शशीकांत शेजवळ (वय- 20, रा. पापर्डे), आणि एकजण (पूर्ण नाव समजू शकले नाही) हे तिघे जण जखमी झाले आहेत. दरम्यान जखमींना तातडीने कराड येथील कृष्णा रुग्णालयात दाखल करण्यात आले असुन यापैकी हर्षद भिसे आणि सुतार यांची प्रकृती गंभीर असल्याचे वैद्यकीय सूत्रांकडून सांगण्यात आले.
एकुलता एक वारस ही हरपला..!
या घटनेतील मृत प्रवीण पवार याचे मूळ गाव ठोंमसे (ता. पाटण) असून गेल्या कित्येक वर्षांपासून तो आपल्या आईसोबत आजोळी चोपदारवाडी येथे राहत होता. आपल्या वडिलांचे ही छत्र हरवल्यामुळे दुर्दैवी प्रवीण हा आपल्या आईच्या आजोळी राहत होता. प्रवीणच्या घरची परिस्थिती अत्यंत हलाखीची असून तो आपल्या आईला एकुलता एक असल्याने त्यांच्या घराण्याचा तो एकमेव वारस होता. मात्र काळाने अचानक त्याच्यावर ही झडप घातल्याने दुर्दैवी प्रवीणच्या कुटुंबावर दुःखाचा डोंगर कोसळला असल्याने परिसरातून हळहळ व्यक्त होत आहे.