पेन्शन धारकांसाठी खूशखबर! पण 28 फेब्रुवारीपर्यंत ‘हे’ काम केलं नाही तर होईल नुकसान

हॅलो महाराष्ट्र ऑनलाइन | ज्या पेन्शनधारकांनी अद्याप जीवन प्रमाणपत्र संबंधित बँकेत भरले नाही त्यांच्यासाठी एक आनंदाची बातमी आहे.अशा लोकांसाठी सरकारने जीवन प्रमाणपत्र दाखल करण्याची अंतिम तारीख वाढवली आहे. कोविड-19 महामारीच्या पार्श्वभूमीवर केंद्र सरकारच्या पेन्शनधारकांसाठी जीवन प्रमाणपत्र सादर करण्याची अंतिम मुदत 28 फेब्रुवारी 2022 पर्यंत वाढवली आहे.

कार्मिक, सार्वजनिक तक्रारी आणि निवृत्ती वेतन मंत्रालयाच्या कार्यालयीन मेमोरँडममध्ये म्हटले आहे की, “विविध राज्यांमध्ये सुरू असलेल्या कोविड-19 साथीच्या आजाराच्या पार्श्वभूमीवर आणि वृद्ध लोकसंख्येच्या कोरोना विषाणूच्या संपर्कात येण्याचा धोका लक्षात घेऊन, सर्व वयोगटातील पेन्शनधारकांना लाइफ सर्टिफिकेट्स सादर करण्यासाठी सध्याची ३१.१२.२०२१ ही मुदत वाढवण्याचा निर्णय घेण्यात आला आहे.

त्यात पुढे म्हटले आहे, “आता, सर्व केंद्र सरकारचे निवृत्तीवेतनधारक 28.02.2022 पर्यंत जीवन प्रमाणपत्रे सादर करू शकतात. या वाढीव कालावधीत, पेन्शन वितरण प्राधिकरणांद्वारे (PDAs) पेन्शन कोणत्याही व्यत्ययाशिवाय देणे सुरू राहील.” मात्र, तसे न केल्यास पेन्शनधारकांचे पेन्शन थांबू शकते. आम्ही आपणास सांगू इच्छितो की, पेन्शनधारकांना दरवर्षी जीवन प्रमाणपत्र सादर करावे लागते.

जीवन प्रमाणपत्र कसे सादर करावे?

पेन्शनधारक पेन्शन वितरण बँकेला भेट देऊन जीवन प्रमाणपत्र सादर करू शकतात. ही सर्वात सामान्य पद्धत आहे. पेन्शनधारकांना बँकेच्या काउंटरवर उपलब्ध असलेला एक फॉर्म भरावा लागेल आणि तो बँक अधिकाऱ्याकडे जमा करावा लागेल. याशिवाय, जर बँक तुम्हाला घरोघरी सेवा देत असेल, तर तुम्ही त्याचा वापर करून तुमचे जीवन प्रमाणपत्र देखील सादर करू शकता.