खटाव | बनपुरी, (ता. खटाव) येथे पत्नीच्या निधनानंतर काही तासातच पतीचेही निधन झाल्याची हृदयद्रावक घटना घडली. बनपुरी येथील प्रभावती रामचंद्र गुरव यांचे मंगळवारी रात्री 12.30 वाजण्याच्या सुमारास हृदयविकाराच्या धक्याने निधन झाले. त्यांना बुधवारी सकाळी 8 वाजता अग्नी देण्यात आला.
त्यानंतर केवळ दोन तासाने बुधवारी सकाळी 10 वाजण्याच्या सुमारास पती रामचंद्र अनंत गुरव (वय- 82) यांचेही निधन झाले. रामचंद्र गुरव यांच्यावर सातारा येथील खासगी रुग्णालयात उपचार सुरु होते. त्यांच्या पश्चात तीन मुले, एक मुलगी सुना, नातवंडे असा परिवार आहे.
पंचायत समितीचे माजी उपसभापती नाना पुजारी, रोहतक (हरियाणा) येथील गलाई व्यवसायीक रघुनाथ पुजारी, दिलीपशेठ पुजारी यांचे ते वडील होत. दिवंगत गुरव पती-पत्नी दोघेही वारकरी सांप्रदाय व धार्मिक कार्यात सक्रीय होते. दोघांनाही एकादशी दिवशीच मृत्यू आल्याने हळहळ व्यक्त होत आहे.
