भारताच्या सार्वजनिक वाहतुकीत नवा मैलाचा दगड! मुंबईत उभारण्यात आलेल्या मेट्रो प्रकल्पांतून आता देशातला सर्वात मोठा मेट्रो डेपो साकार होणार आहे. मंडाले येथे उभारलेल्या 31 हेक्टरच्या भव्य डेपोमध्ये एकाच वेळी तब्बल 72 मेट्रो ट्रेन उभ्या राहू शकतील.
प्रकल्पाची वैशिष्ट्ये
72 मेट्रो एकत्र उभ्या राहतील अशा क्षमतेचा भारतातील सर्वात मोठा डेपो मुंबईच्या मंडाले येथे उभा राहणार आहे.
मेट्रो 2B च्या पहिल्या टप्प्याची ट्रायल यशस्वी झाली आहे. डीएन नगर ते मंडाले मार्गावर 5 स्थानकं सज्ज आहेत.
5.39 किमीचा पहिला टप्पा पूर्ण झाला असून मंडाले ते डायमंड गार्डनपर्यंत प्रवाशांसाठी लवकरच मेट्रो सेवा सुरू होणार आहे
एकूण 23 किमी लांबीचा मेट्रो 2B मार्ग असून अंधेरी पश्चिम ते मानखुर्द दरम्यान प्रवास सुलभ होणार
मेट्रोचा विकास
मुंबई मेट्रो लाईन-५ अंतर्गत ठाणे-भिवंडी-कल्याण या मार्गावरही मोठी कामगिरी पार पडली आहे. अंजुरफाटा, भिवंडी येथे मध्य रेल्वे मार्गावर 65 मीटर लांबीचा “ओपन वेब गर्डर” (OWG) यशस्वीरित्या बसवण्यात आला. ही कामगिरी तब्बल २० मीटर उंचीवर, चालू रेल्वेमार्ग आणि वर्दळीच्या महामार्गावर अत्यंत अचूकतेने केली गेली.
मुंबईकरांसाठी मोठा दिलासा
पूर्व आणि पश्चिम उपनगरांना थेट जोडणारा हा मेट्रो मार्ग, विशेषतः हार्बर रेल्वेच्या प्रवाशांसाठी, प्रवासात मोठा बदल घडवून आणणार आहे. रस्त्यावरची वाहतूक कोंडी, वेळेचा अपव्यय आणि प्रदूषण कमी होऊन अधिक वेगवान, सुरक्षित आणि आरामदायक प्रवास मुंबईकरांना अनुभवता येणार आहे.
महत्त्वाकांक्षी आणि ऐतिहासिक पावलं
“रेल्वे प्रमाणे मेट्रोचंही मजबूत जाळं तयार करणं, ही आजच्या काळाची गरज आहे. मुंबईचा मेट्रो डेपो ही त्या दिशेने टाकलेली भक्कम पायरी आहे,” असे मत सार्वजनिक प्राधिकरणांनी व्यक्त केले.
