मुंबई । मुख्यमंत्री उद्धव ठाकरे यांची राज्यपाल कोट्यातून विधान परिषदेवर नियुक्ती होणार की नाही, याकडे संपूर्ण महाराष्ट्राचे लक्ष लागले असताना राज्य मंत्रिमंडळाने आज पुन्हा एकदा याबाबत राज्यपाल भगतसिंह कोश्यारी यांना विनंती केली. महाराष्ट्रावर अभूतपूर्व असं कोरोनाचं संकट कोसळलं आहे. अशा वेळी उद्धव ठाकरे सध्या विधान परिषद किंवा विधानसभा यापैकी एकाही सभागृहाचे सदस्य नाहीत. त्यांना मुख्यमंत्रिपदावर कायम राहण्यासाठी याची पूर्तता करावी लागणार आहे. २८ मेपर्यंत त्यांना कोणत्याही एका सभागृहाचे सदस्य व्हावे लागणार आहे. एकीकडे महाराष्ट्र कोरोनाशी लढा देत असताना मुख्यमंत्र्यांपुढे हा मोठा पेच निर्माण झाला आहे.
त्यापूर्वी उपमुख्यमंत्री अजित पवार यांच्या अध्यक्षतेखाली ९ एप्रिल रोजी झालेल्या मंत्रिमंडळाच्या बैठकीत महाराष्ट्र विधान परिषदेच्या एका रिक्त जागेवर विद्यमान मुख्यमंत्री उद्धव ठाकरे यांची नियुक्ती करण्याची शिफारस करण्याचा निर्णय घेतला होता व तशी शिफारस राज्यपालांकडे करण्यात आली होती.
सध्या करोनाच्या संकटकाळात शासन-प्रशासन जोमाने संकटाचा मुकाबला करत आहे. करोनाचे संकट दिवसेंदिवस वाढत आहे. अशा परिस्थितीत राज्यातील अस्थिरता दूर होणे अत्यावश्यक आहे. त्यामुळे मंत्रिमंडळाने आज महाराष्ट्र विधान परिषदेच्या एका रिक्त जागेवर विद्यमान मुख्यमंत्री उद्धव ठाकरे यांची नियुक्ती करण्याच्या शिफारशींवर राज्यपालांनी तातडीने कार्यवाही करावी या विनंतीचा पुनरुच्चार केला.
येत्या २८ मेपर्यंत त्यांना विधान परिषद किंवा विधानसभा यापैकी कोणत्याही एका सभागृहाचे सदस्य व्हावे लागणार आहे. राज्यपालांनी त्यांच्या कोटातील एका जागेवर उद्धव ठाकरे यांची नियुक्ती करावी, अशी शिफारस ९ एप्रिल रोजी राज्य मंत्रिमंडळाने केलेली आहे. त्यावर राज्यपालांनी अद्याप कोणताही निर्णय घेतलेला नाही. त्यावरून सत्ताधारी आणि विरोधी पक्षाच्या नेत्यांत बरेच खटकेही उडत आहेत. त्यातच आज राज्यपालांकडे करण्यात आलेल्या शिफारशीबाबत पुन्हा एकदा मंत्रिमंडळाने विनंती केल्याने राज्यपाल कोणता निर्णय घेतात, याकडे सर्वांच्याच नजरा लागल्या आहेत.