हॅलो महाराष्ट्र ऑनलाईन| महाराष्ट्राला हादरवून सोडेल अशी अंगावर काटा आणणारी घटना नुकतीच मुंबईतील (Mumbai) गोवंडी परिसरात घडली आहे. याठिकाणी एका निर्दयी आईने तिच्या पोटच्या पोरीला अंगावर चटके दिले आहेत. 9 वर्षीय मुलीने बिछान्यामध्येच लघवी केल्यामुळे निर्दयी आईने कोणताही विचार न करता मुलीच्या पाठीवर, मांड्यावर आणि प्रायव्हेट पार्टवर चटके दिले. यामुळे मुलीला गंभीर दुखापत झाली आहे. या महिलेविरोधात शिवाजीनगर पोलिसात गुन्हा दाखल करण्यात आला आहे.
समोर आलेल्या माहितीनुसार, 9 वर्षीय चिमुकलीने बिछान्यामध्ये लघवी केल्यामुळे आईचा राग अनावर झाला होता. या रागामध्ये तिने मुलीला गंभीररित्या चटके दिले. एवढेच करून न थांबता महिलेने गॅसवर एक भांडे गरम केले. यानंतर त्याच भांड्याने मुलीच्या प्रायव्हेट पार्टवर चटके दिले. हा सर्व प्रकार घडत असताना मुलीचे वडील कामावर गेले होते. आईने दिलेल्या चटक्यांमुळे मुलगी वेदनेने व्हिवळू लागली, ओरडू लागली. त्यामुळे शेजारचांही संशय आला. त्यांनी विचारणा केली तर महिलेने शेजारच्यांना शिवीगाळ केली.
तसेच हे आमचे कौटुंबिक प्रकरण आहे, तुम्ही यात लक्ष घालू नका असेही सांगितले. त्यामुळे शेजारच्यांनी आपत्कालीन 100 क्रमांकावर कॉल करून लक्षात आलेला सर्व प्रकार पोलिसांना कळवला. यानंतर पोलिसांनी तातडीने घटनास्थळी धाव घेतली. तेव्हा मुलीला झालेल्या जखमा पोलिसांनी पाहिल्या. यानंतर त्यांनी शेजारच्यांच्या तक्रारीच्या आधारावर आईच्या विरोधात गुन्हा दाखल केला. तसेच ताबडतोब मुलीला उपचारासाठी रुग्णालयात हलवले. या सर्व घटनेमुळे परिसरात खळबळ उडाली.
दरम्यान, संबंधित मुलगी आपल्या आईसह आणि सावत्र वडिलांसोबत गोवंडीतील बैंगनवाडी परिसरात राहत होती. आरोपी महिलेला पहिल्या पतीपासूनच दोन मुली आहेत. तर दुसऱ्या पतीपासून दोन मुले आहेत. या सर्व घटनेमुळे संपूर्ण महाराष्ट्र हादरले आहेत. तर, पोलिसांनी या घटनेचे गांभीर्य लक्षात घेत भारतीय न्याय संहितेच्या कलम ३५२, ११८(१), ११५(२) अशा विविध कलमांअंतर्गत आईच्या विरोधात गुन्हा दाखल केला आहे.