नाशिक : हॅलो महाराष्ट्र – काही दिवसांपूर्वी नाशिक महानगरपालिकेच्या वैद्यकीय अधिकारी डॉ. सुवर्णा वाजे यांचा मृतदेह एका गाडीत जळालेल्या अवस्थेत मृतदेह आढळून आला होता. त्यांचा मृत्यू हा अपघात होता कि घातपात होता हे स्पष्ट झाले नव्हते. या प्रकरणात आता एक नवीन माहिती समोर आली आहे. जळालेल्या गाडीत आढळलेल्या मृतदेहाचा डीएनए अहवाल आला आहे.या अहवालात मृतदेहाचा डीएनए आणि डॉ. सुवर्णा वाजे यांचा डीएनए सेम असल्याचे स्पष्ट झाले आहे. यामुळे डॉ. सुवर्णा वाजे यांची हत्या केली असावी असे स्पष्ट झाले आहे.
काय आहे प्रकरण ?
डॉ. सुवर्णा वाजे या नाशिक महानगरपालिकेच्या सिडको रुग्णालयात वैद्यकीय अधिकारी म्हणून कार्यरत होत्या. घटनेच्या दिवशी रायगड नगर परिसरात एका जळालेल्या कारमध्ये मृतदेह आढळल्याने शहरात एकच खळबळ उडाली होती. डॉ. सुवर्णा वाजे या बेपत्ता असल्याची तक्रार त्यांच्या कुटुंबीयांनी पोलिसांनासुद्धा दिली होती. पोलीस तपासात जळालेल्या गाडीचा चेसी नंबर आणि गाडी नंबर यावरुन ही गाडी डॉ. सुवर्णा वाजे यांची असल्याचं स्पष्ट झालं होते. यानंतर पोलिसांनी मृतदेहाचा डीएनए आणि डॉ. सुवर्णा वाजे यांचा डीएनए चेक केला असता तो एकच असल्याचे समोर आले.
25 जानेवारी रोजी नेमकं काय घडलं होतं? डॉ सुवर्णा वाजे या गाडीतून एकट्याच गाडीतून गेल्या होत्या की त्यांच्यासोबत आणखी कोण होतं? याचा तपास पोलिसांकडून करण्यात येत आहे. आसपासच्या परिसरातील सीसीटीव्हीच्या आधारे पोलिसांकडून तपास करण्यात येत आहे. जळालेल्या गाडीत आढळेला मृतदेह हा डॉ. सुवर्णा वाजे यांचाच असल्याने हा एक घातपात असल्याचे समजत आहे. डॉ सुवर्णा वाजे या नाशिक महानगरपालिकेच्या रुग्णालयात वैद्यकीय अधिकारी म्हणून कार्यरत होत्या. कोरोनाच्या काळात त्यांनी केलेल्या कामाचे कौतुकही करण्यात आले होते.
