हॅलो महाराष्ट्र ऑनलाईन । मराठी सिनेविश्वातील अनेक कलाकृती प्रचंड गाजल्या आहेत. यांपैकी एक म्हणजे ‘नवरा माझा नवसाचा’. २००४ साली हा चित्रपट प्रदर्शित झाला होता. मात्र आजही या चित्रपटाचे चाहते आहेत. एव्हरग्रीन कलाकृतींमध्ये या चित्रपटाचा समावेश आहे. अशातच आता १९ वर्षांनंतर ‘नवरा माझा नवसाचा’ या चित्रपटाचा सिक्वल म्हणजेच ‘नवरा माझा नवसाचा २’ लवकरच प्रेक्षकांच्या भेटीस येत आहे. अलीकडेच या चित्रपटाची घोषणा करण्यात आली आहे. यानंतर आता ‘नवरा माझा नवसाचा २’ हा चित्रपट कधी प्रदर्शित होणार? याबाबत चाहत्यांमध्ये विशेष उत्सुकता असताना सचिन पिळगांवकर यांनी रिलीज डेटबाबत मोठी घोषणा केली आहे.
‘नवरा माझा नवसाचा २’ या चित्रपटाची ५ फेब्रुवारी २०२४ रोजी निर्माते, दिग्दर्शक सचिन पिळगांवकर यांनी घोषणा केली होती. तेव्हापासून सोशल मीडियावर नवरा माझ्या नवसाचा या चित्रपटाचे हिट झालेले डायलॉग्स, गाणी यावर वेगवेगळे रिल्स पहायला मिळत आहेत. आजही प्रेक्षकांच्या मनावर या चित्रपटातील भूमिकांची छाप कायम आहे. त्यामुळे ‘नवरा माझा नवसाचा २’ येणार म्हटल्यापासून प्रेक्षकवर्गात आनंदी आनंद पहायला मिळतोय. ‘नवरा माझा नवसाचा २’ या चित्रपटाचं चित्रीकरण सुरू झालं असून आता प्रेक्षक रिलीजची वाट पाहत आहेत.
अभिनेत्री पूजा सावंतने बुधवारी सिद्धेश चव्हाणसोबत लग्नगाठ बांधली. तिच्या लग्नाला मराठी कलाविश्वात अनेक कलाकार मंडळी हजर होती. या सोहळ्याला अभिनेते सचिन पिळगांवकर यांनीदेखील खास उपस्थिती लावली होती. दरम्यान माध्यमांशी संवाद साधतेवेळी सचिन पिळगांवकर यांनी आपल्या आगामी चित्रपट ‘नवरा माझा नवसाचा २’बाबत एक मोठी घोषणा केली. ज्यामध्ये त्यांनी आपण या चित्रपटाबाबत उत्सुक असल्याचे सांगत हा चित्रपट कशी प्रदर्शित होणार याबाबतदेखील भाष्य केले आहे.
सचिन पिळगांवकर म्हणाले की, ‘मी ”नवरा माझा नवसाचा २” या चित्रपटासाठी खूप उत्सुक आहे. तुमच्या शुभेच्छा अत्यंत महत्त्वाच्या आहेत. कोणत्याही परिस्थितीत याचवर्षी हा चित्रपट प्रदर्शित होणार आहे. पण गणपतीच्या आशीर्वादने. जर त्याचा आशीर्वाद असला तर याच वर्षी हा चित्रपट प्रदर्शित होईल’. दरम्यान एका वृत्तानुसार, ‘नवरा माझा नवसाचा २’ या चित्रपटात ज्येष्ठ अभिनेते अशोक सराफ, सचिन पिळगांवकर, सुप्रिया पिळगांवकर, स्वप्नील जोशी, हेमल इंगळे, अलीसागर, निर्मिती सावंत, निवेदिता सराफ, वैभव मांगले, सिद्धार्थ जाधव, संतोष पवार, जयवंत वाडकर अशी दिग्गज कलाकारांची मांदियाळी पहायला मिळणार आहे. त्यामुळे साहजिकच प्रेक्षकांमध्ये या चित्रपटाबाबत विशेष उत्सुकता आहे.