औरंगाबाद – रविवारी चेन्नई येथे झालेल्या राष्ट्रीय ट्रायथलॉन स्पर्धेत औरंगाबादचा पहिला दिव्यांग आयर्नमॅन निकेत दलाल चँपियन ठरला. दिव्यांगासाठी पहिल्यांदाच आयोजित करण्यात आलेल्या या राष्ट्रीय पातळीवरील स्पर्धेत त्याने सुवर्णपदक पटकावले. त्याने स्प्रिंटच्या तिन्ही इव्हेंटमध्ये उल्लेखनीय कामगिरी करताना चॅम्पियन होण्याचा बहुमान पटकावला. अंध निकेतने आपल्या गटातील 18 स्पर्धकांमधून अव्वल स्थान गाठले.
चेन्नई येथे, भारतीय ट्रायथलॉन महासंघांच्यावतीने या राष्ट्रीय स्पर्धेचे आयोजन करण्यात आले होते. या स्पर्धेत औरंगाबादचा दिव्यांग आयर्नमॅन निकेत दलालने सहभाग घेतला. त्याने सुपर स्प्रिंटच्या तिन्ही इव्हेंटमध्ये लक्षवेधी कामगिरी केली. त्याने स्वींमिंगमध्ये 9 मिनिटांत निश्चित 250 मीटरचे अंतर गाठून अव्वल स्थानी धडक मारली. ओपन वॉटरमध्ये ही स्पर्धा आयोजित करण्यात आली होती. त्यानंतर त्याने सायकलिंग करताना ७ किलोमीटरचे अंतर 14 मिनिट 16 सेकंदांत पूर्ण केले. त्यापाठोपाठ रनिंगचे 1.3 किमीचे अंतर 7 मिनिटे 55 सेकंदांत गाठले. प्रत्येक फेरीत अव्वल क्रमांक पटकावत औरंगाबादच्या खेळाडूने सुवर्णपदक प्राप्त केले. निकेत दलालने सुपर स्प्रिंट इव्हेंट मध्ये 250 मीटर स्विमिंग (ओपन वॉटर) – 9 मिनिट सायकलिंग (7 किलोमीटर , दोन लॅप) – 14 मिनिटे 16 सेंकद रनिंग (1.3 किलो मीटर)-7 मिनिटे 55 सेकंदात पार केले. इतर स्पर्धकांच्या तुलनेत तो सर्व फेऱ्यांमध्ये अव्वल राहिला.
आंतरराष्ट्रीय पातळीवर ठसा उमटवणार!
निकेत दलालने या स्पर्धेत उत्तम कामगिरी करण्यासाठी प्रचंड मेहनत घेतली. नियोजनबद्ध सराव केला. याच मेहनतीतून त्याला सोनेरी यशाचा पल्ला गाठता आला. आगामी काळातील आंतरराष्ट्रीय स्पर्धांमध्येही त्याला आपला ठसा उमटवण्याची मोठी संधी आहे. प्रचंड क्षमता आणि इच्छाशक्तीच्या बळावर त्याने या स्पर्धेत उल्लेखनीय कामगिरी केली, अशी प्रतिक्रिया निकेतचे प्रशिक्षक अभय देशमुख यांनी दिली.