अहमदनगर : केडगाव हत्याप्रकरणामधे काॅग्रेसचे नगरसेवक विशाल कोतकर यांना अटक करण्यात आली आहे. शिवसेना पदाधिकार्याच्या हत्या प्रकरणामधे विशाल कोतकर मुख्य सुत्रधार असल्याचा संशय सर्वत्र व्यक्त केला जात आहे. ७ एप्रिल रोजी केडगाव येथे शिवसेनेचे शहरउपप्रमुख संजय कोतकर व वसंत ठुबे यांची गोळ्या झाडून हत्या करण्यात आली होती. केडगाव प्रकरणामधे आत्तापर्यंत ९ जणांना अटक करण्यात आलेली आहे.
तत्पुर्वी गुरुवारी हत्याकांडाला कारणीभूत ठरलेल्या रवी खोल्लम याला नगर पोलिसांनी अटल केले होते. केडगाव पोटनिवडणूकीत संजय कोतकर व रवी खोल्लम यांच्यामधे मतदानाच्या कारणावरुन वाद झाला होता. खोल्लमला २૪ एप्रिलपर्यंत कोठडीत ठेवण्याचा आदेश न्यायालयाने दिला आहे. तसेच या हत्याकांडप्रकरणी पोलीस कोठडीत असलेले राष्ट्रवादीचे आमदार संग्राम जगताप, बी. एम. कोतकर, बाळासाहेब कोतकर यांच्या कोठडीत दोन दिवसांची वाढ करण्यात आली आहे. मुख्य आरोपी संदीप गुंजाळ व बाबासाहेब केदार यांना तीन दिवसांची कोठडी सुनावण्यात आली.

पुणे : भिमा कोरेगाव हिंसाचार प्रकरणातील प्रमुख साक्षीदार पुजा सुरेश सकट या १७ वर्षाच्या मुलीचा घराजवळील विहीरीमधे मृतदेह आढळून आल्याने भिमा कोरेगाव आणि परिसरामधे एकच खळबळ उडाली आहे. पुजा मागील दोन दिवसांपासून बेपत्ता होती. वाडा पुनर्वसन येथील विहिरीमधे तिचा मृतदेह सापडल्याने कुटुंबियांवर शोककळा पसरली. १ जानेवारी २०१८ रोजी भिमा कोरेगाव येथे झालेल्या दलित आणि हिंदुत्ववादी गटांमधील हिंसाचार प्रकरणामधे पुजा फिर्यादी होती. पुजाचा मृत्यु हा घातपातामधून झाला असल्याची शक्यता वर्तवण्यात येत असून तिच्या कुटुंबियांनी जिल्हाधिकार्यांची भेट घेवून चौकशीची मागणी केली आहे.

यापूर्वीही एकमेव साक्षीदार असलेल्या पुजाच्या कुटुंबियांनी पुजाला आणि कुटुंबियांना अज्ञातांकडून धमक्या येत असल्याची तक्रार केली होती. पुजाच्या संशयीत मृत्युच्या पार्श्वभुमीवर पूजा हिच्या मृत्यूस कारणीभूत असलेल्या अ‍ॅड. सुधीर ढमढेरे, विलास श्रीधर वेदपाठक, गणेश विलास वेदपाठक, नवनाथ ज्ञानोबा दरेकर, सोमनाथ फक्कड दरेकर, विलास काळुराम दरेकर, सुभाष गणपत घावटे, गोरक्ष पाटीलबुवा थोरात, गणेश गोरक्ष थोरात या ८ जणांच्याविरुद्ध शिक्रापूर पोलिस ठाण्यात आत्महत्तेस प्रवृत्त केल्याचा गुन्हा दाखल करण्यात आला असून दोन जणांना अटक करण्यात आली आहे.

श्रीनगर:जम्मू काश्मीरमधील पुलवामा जिल्ह्यातील त्राल परिसरातील लाम गावामध्ये भारतीय लष्कर व दहशतवाद्यांमध्ये गोळीबार सुरू असून या चकमकीत एक जवान व एक पोलीस शहीद झाल्याचे वृत्त आहे. मिळालेल्या माहितीनुसार, परिसरात दहशतवादी लपून बसल्याची माहिती मिळाल्यानंतर जवानांनी परिसराला घेराव घालत शोधमोहीम सुरू केली. यावेळी दहशतवाद्यांनी जवानांवर गोळीबार केला.

त्यास जवानांनी चोख प्रत्युत्तरदेखील दिले. यावेळी भारतीय लष्कराला याठिकाणी दहशतवादी लपून बसल्याची माहिती मिळाली होती त्यानुसार भारतीय लष्कराने हि कारवाई केली आहे.