काबूल । तालिबान्यांनी अफगाणिस्तानवर कब्जा केल्यानंतर आता सरकार स्थापनेचा फॉर्म्युलाही ठरला आहे. येत्या तीन दिवसात त्याची घोषणा केली जाईल. टोलो न्यूजच्या मते, तालिबान सरकार स्थापनेसाठी इराणच्या मॉडेलचे पालन करेल. एक सुप्रीम लीडर असेल आणि पंतप्रधान किंवा राष्ट्रपती त्याच्या अंतर्गत काम करतील. तालिबानच्या संस्कृती आयोगाचे सदस्य आमुल्ला सामंगानी म्हणाले,”आमचे नवीन इस्लामिक सरकार जगासाठी एक आदर्श असेल. मुल्ला हिबतुल्ला अखुंदजादा आमचे सर्वोच्च नेते असतील आणि आम्ही त्यांच्या नेतृत्वाखाली काम करू.”
इराणमध्येही इस्लामिक सरकारचे मॉडेल लागू आहे. येथे एक सुप्रीम लीडर आहे आणि त्याच्या अंतर्गत राष्ट्रपती सरकार चालवत आहेत. अयातुल्ला अली खामेनी सध्या इराणचे सुप्रीम लीडर आहेत, तर इब्राहिम रईसी सध्या इराणचे अध्यक्ष आहेत.
दरम्यान, काबूलमधील राष्ट्रपती भवनात होणाऱ्या भव्य समारंभाची तयारी जोरात सुरू आहे. मिळालेल्या माहितीनुसार, नवीन तालिबान सरकार स्थापनेच्या निमित्ताने भारतासह अनेक देशांच्या प्रमुखांना आमंत्रणे पाठवली जाणार आहेत. कतारमधील तालिबानच्या राजकीय कार्यालयाचे उपप्रमुख शेर अब्बास स्टेनिकझाई यांनी पुष्टी केली की,” सर्व अफगाण वांशिक गटांना या नवीन सरकारमध्ये प्रतिनिधित्व दिले जाईल.” 2001 मध्ये अमेरिकेच्या ताब्यात आल्यानंतर ज्यांनी मंत्रिमंडळात काम केले त्यांना या नवीन मंत्रिमंडळात स्थान दिले जाणार नाही, असेही ते म्हणाले.
तालिबान नेत्याने सरकारला मान्यता देण्याचे आवाहन केले
सरकारच्या स्वरूपाविषयी तपशील न देता, स्टॅनिकझाई म्हणाले की,”नवीन सरकारमध्ये महिला महत्वाची भूमिका बजावणार आहेत. स्त्रियांना मंत्रीपदासारख्या उच्च स्थानावर स्थान दिले जाईल की नाही हे त्यांनी अद्याप स्पष्ट केलेले नाही. तालिबानच्या नेत्याने आंतरराष्ट्रीय समुदायाला नवीन अफगाणिस्तान सरकारला मान्यता देण्याचे आवाहन केले, कारण देशात शांततामय सरकार असण्याची ही 40 वर्षांतील पहिलीच वेळ आहे.”
स्टेनिकझाई म्हणाले, “सर्व अफगाणी एकत्र आहेत आणि आम्हाला आशा आहे की, अमेरिका, युरोपियन युनियन आणि उर्वरित जग आमच्या सरकारला मान्यता देईल.” ते पुढे म्हणाले की,” दोहामध्ये परदेशी राजदूतांशी चर्चा सुरू आहे.”