हॅलो महाराष्ट्र ऑनलाईन । सध्या राष्ट्रवादी काँग्रेस पक्षाचे अध्यक्ष शरद पवार यांच्यावर भाजपसह विरोधी असलेल्या संघटनेंतील नेत्यांकडून टीका होऊ लागली आहे. दरम्यान आज भाजपचे आमदार गोपीचंद पडळकर यांनी टीका केल्यानंतर रयत क्रांती संघटनेचे नेते सदाभाऊ खोत यांनी पवारांवर निशाणा साधला आहे. “शरद पवार तुम्ही कधी तरी खरं बोलणार आहात का? तुमची सत्तेची खुर्ची उबवण्याची हौस कोणत्या जन्मात फिटणार आहे?” अशी घणाघाती टीका खोत यांनी केली आहे.
रयत क्रांती संघटनेचे नेते सदाभाऊ खोत यांनी आज सांगीत माध्यमांशी संवाद साधला. यावेळी त्यांनी मराठा आरक्षणाच्या मुद्यांवरून राष्ट्रवादी काँग्रेसपक्षाचे अध्यक्ष शरद पवार यांच्यावर टीका केली. यावेळी ते म्हणाले की, राज्यांना ओबीसींची यादी तयार करून आरक्षणाचा निर्णय घेऊ शकता, असे केंद्राने भूमिका मांडली आणि दुरुस्तीही केली. पण त्याचा काही उपयोग होणार नाही, असे शरद पवार म्हणत आहेत.
मात्र, शरद पवार साहेब तुम्ही ज्येष्ठ आहात आणि तुम्ही कधीतरी खरं बोलणार आहात का? अजून किती वर्षे समाजा- समाजामध्ये तेढ निर्माण करून राजकीय पोळी भाजण्याचा उद्योग करणार आहात? तसेच तुमची राजकारणाची आणि सत्तेची खुर्ची उबवण्याची हौस कोणत्या जन्मात फिटणार आहे? हे एकदा महाराष्ट्राच्या जनतेला सांगावे, असे खोत यांनी म्हंटले आहे.