सांगली : हॅलो महाराष्ट्र – सांगली जिल्ह्यातील मिरजमधील राष्ट्रवादीच्या नगरसेविका संगीता अभिजित हारगे यांच्या विरोधात अ‍ॅट्रॉसिटीचा गुन्हा दाखल करण्यात आला आहे. यामुळे राजकीय वर्तुळात मोठी खळबळ उडाली आहे. विशेष म्हणजे राष्ट्रवादीच्या सामाजिक न्याय विभागाच्या सांगली जिल्हाध्यक्षा संध्या आवळे यांच्या तक्रारीनुसार राष्ट्रवादीच्याच नगरसेविकेवर हा गुन्हा नोंदवण्यात आला आहे. आर्थिक देवाणघेवाणीतून संध्या आवळे यांना शारीरिक, मानसिक, आर्थिक त्रास देण्यात आला तसेच जातिवाचक शिवीगाळ करुन अपमानास्पद वागणूक देण्यात आल्याचा दावा संध्या आवळे यांनी केला आहे. याबाबत मिरज शहर पोलीस ठाण्यात नगरसेविका संगीता अभिजित हारगे यांच्या विरोधात गुन्हा दाखल करण्यात आला आहे. राष्ट्रवादीच्या नगरसेविका संगीता हारगे या सांगली महापालिकेच्या माजी स्थायी सभापती असून, राष्ट्रवादीचे शहर अध्यक्ष अभिजित हारगे यांच्या पत्नी आहेत.
काय आहे प्रकरण?
मिरज येथील राष्ट्रवादीच्या सामाजिक न्याय विभागाच्या सांगली जिल्हाध्यक्षा संध्या आवळे यांनी पतीच्या आजारपणामुळे आणि लॉकडाऊनमध्ये पैशाची गरज असल्याने नगरसेविका संगीता हारगे यांच्याकडून 2021 मध्ये 55 हजार रुपये उधार घेतले होते. त्या बदल्यात नगरसेविका संगीता हारगे यांनी त्यावर पाच टक्के व्याजाची आकारणी केली. त्यापैकी 39 हजार रुपये रक्कम परत केली असता थोड्या प्रमाणात मुद्दलसुद्धा जमा केली असल्याचे संध्या आवळे यांनी आपल्या तक्रारीत म्हंटले आहे.
यावेळी नगरसेविका संगीता हारगे यांनी वारंवार अजून 52 रुपये द्यायला लागतील असे सांगून धमकावले. यानंतर शारीरिक, मानसिक आणि आर्थिक त्रास देत असल्याची तक्रार संध्या आवळे यांनी मिरज शहर पोलीस ठाण्यात केली. तसेच थकित रक्कम फेडण्यासाठी जातीवाचक भाषा वापरून अवमानित करत असल्याचेसुद्धा संध्या आवळे यांनी आपल्या तक्रारीत म्हंटले आहे. या प्रकरणामुळे राष्ट्रवादीला मोठा धक्का बसला आहे.