हॅलो महाराष्ट्र ऑनलाईन । महाराष्ट्राची राजधानी असलेल्या मुंबईला मुसळधार पावसाने (Mumbai Rain) झोडपलं आहे. काल मध्यरात्रीनंतर 1 वाजेपासून ते आज सकाळी 7 वाजेपर्यंत या सहा तासांच्या कालावधीत विविध ठिकाणी 300 मिलिमीटर पेक्षा अधिक पावसाची नोंद झाली आहे. जोरदार पावसामुळे मुंबई ठाण्याच्या विविध भागात आणि रेल्वे ट्रॅकवर पाणी साचलं आहे. त्यामुळे मध्य, पश्चिम आणि हार्बर मार्गावरील लोकल उशीराने धावत असल्याची माहिती रेल्वेकडून देण्यात आली आहे. तर पुण्याला जाणारी सिंहगड आणि डेक्कन एक्स्प्रेस रद्द (Sinhagad and Deccan Express Cancelled) करण्यात आली आहे.
मुंबईच्या पावसाचा फटका पुणेकरांना सुद्धा बसला आहे. कारण या महाप्रचंड पावसामुळे पुणे-मुंबई रेल्वेसेवा विस्कळीत झाल्याचे पाहायला मिळत आहे. पावसामुळे सिंहगड आणि डेक्कन एक्स्प्रेस रद्द करण्यात आल्याची माहिती देण्यात आली आहे. त्यामुळे मुंबई- पुणे रेल्वे प्रवास करणाऱ्या प्रवाशांनी आधी हि माहिती जाणून घेणं महत्वाचे आहे. याशिवाय भांडुप रेल्वे रुळावर पाणी साचल्याने मध्य रेल्वे सेवा विस्कळीत झाली आहे. कोल्हापूर ते मुंबईकडे जाणारी एक्सप्रेस तब्बल दीड तासांपासून रेल्वे रुळावर आहे. एकूणच मुंबईची लाईफलाईन असलेली रेल्वे आज पावसात उभी आहे. रेल्वे कर्मचाऱ्यांकडून पाणी उपसण्याचे काम युद्धपातळीवर सुरू आहे. मात्र पावसाचा जोर जोपर्यंत कमी होत नाही तोपर्यंत मुंबईतील परिस्थिती आशाची राहण्याची शक्यता आहे.
दरम्यान, आजही मुंबईत धुव्वाधार पावसाची शक्यता असून त्यापार्श्वभूमीवर सर्व शासकीय आणि खासगी माध्यमांच्या शाळांना तसेच महाविद्यालयांच्या सकाळच्या सत्रासाठी सुट्टी जाहीर करण्यात आली आहे. यानंतर पावसाचा अंदाज घेऊन दुसऱ्या सत्रातील म्हणजे दुपारच्या सत्रातील शाळा महाविद्यालयांना सुट्टी द्यायची की नाही याबाबतचा निर्णय घेतला जाईल. असं मुंबई महानगरपालिका प्रशासनकडून सांगण्यात येत आहे. मुंबईत जे नोकरी करतात त्या नोकरदारांना सुद्धा घराबाहेर न पडण्याचं आवाहन करण्यात आलं आहे.