मुंबई | मुंबईची नव्याने जी लाइफलाइन तयार होत आहे. त्या मेट्रो 3 च्या पहिल्या ट्रेनचे टेस्टिंग केले आहे. यशस्वीरित्या हे टेस्टिंग झाले आहे. आता ही मेट्रो धावण्यापासून कोणीही थांबवू शकत नाही, हा सिग्नलच आपण दिला आहे. असा टोला उपमुख्यमंत्री देवेंद्र फडणवीस यांनी उद्धव ठाकरे यांना दिला आहे.
मेट्रो 3 च्या पहिल्या ट्रेनची चाचणी आज घेण्यात आली, ट्रायल रनसाठी मुख्यमंत्री एकनाथ शिंदे आणि उपमुख्यमंत्री यांनी हिरवा झेंडा दाखविला. या कार्यक्रमप्रसंगी देवेंद्र फडणवीस बोलत होते. यावेळी त्यांनी उद्धव ठाकरे यांच्यावर अप्रत्यक्ष टीका केली. मुख्यमंत्री झाल्यापासून एकनाथ शिंदे यांनी सर्वात आधी कोणते काम केले असेल तर ते म्हणजे या प्रकल्पातील सर्व अडथळे दूर केले. त्यामुळे आता यामध्ये काहीही अडचणी राहिलेल्या नाहीत. काही आल्याच तर त्या दूर करण्याचा आमचा मानस राहील, असे फडणवीस म्हणाले.
मेट्रो प्रकल्प 2023 च्या मार्चपर्यंत पूर्ण धावू शकला असता. परंतु काही वादविवाद झाल्याने डिसेंबर पर्यंत अर्धा धावणार आहे. मुख्यमंत्र्यांनी निर्णय केला नसता तर पुढील चार वर्षे मेट्रो धावली नसती. मेट्रोच्या कार शेडचा वाद हा पर्यावरणापेक्षा जास्त राजकीय झाला. कोर्टाने कार शेड तयार करण्यासाठी परवानगी दिली. पर्यावरणाला सगळ्यात जास्त सपोर्ट करणारी मेट्रो 3 आहे.
शिंदे- फडणवीस यांच्या शपथविधीला आज दोन महिने पूर्ण ः- आमच्या दोघांचा शपथविधीला दोन महिने आज पूर्ण झाले. स्थगिती उठवून दीर्घकाळ प्रलंबित प्रकल्प पुढे नेण्याचा प्रयत्न केला. तत्कालीन मुख्यमंत्री देवेंद्र फडणवीस यांच्या कार्यकाळात अनेक प्रकल्प सुरू झाले. यात राजकीय प्रदूषण जास्त झाले. आता मेट्रो हा वाहतुकींवर रामबाण उपाय देणारा हा प्रकल्प आहे, असे मुख्यमंत्री एकनाथ शिंदे यांनी सांगितले.