दिलासादायक! राज्यात कोरोनाचे रुग्ण बरे होण्याचा दर ५० टक्क्याहून अधिक

मुंबई । मागील काही महिन्यांपासून कोरोनामुळं निर्माण झालेल्या तणाव आणि चिंताजनक वातावरणात एक दिलासादायक बातमी समोर आली आहे. राज्याचा रुग्ण बरे होण्याचा दर ५०.६१ टक्के एवढा झाला असून एकूण ॲक्टिव्ह रुग्णांपेक्षा बरे झालेल्या रुग्णांची संख्या आता जास्त झाली आहे. राज्यात आज ५ हजार ७१ रुग्णांना घरी सोडण्यात आले. आतापर्यंत घरी सोडण्यात आलेल्या रुग्णांची एकूण संख्या ५६ हजार ४९ झाली आहे.

राज्यात काल आणखी ३ हजार ३९० कोरोनाबाधित रुग्णांची नोंद झाल्याने एकूण रुग्णांची संख्या १ लाख ७ हजार ९५८ झाली आहे. तर काल या आजाराने १२० जणांचा मृत्यू झाला. राज्यात आतापर्यंत ३ हजार ९५० कोरोनाबाधितांचा मृत्यू झाला आहे. दरम्यान, कोरोनाच्या २७८६ नवीन रुग्णांचे निदान झाले असून सध्या राज्यात ५० हजार ५५४ रुग्णांवर (ॲक्टीव्ह) उपचार सुरू आहेत, अशी माहिती राज्याचे आरोग्यमंत्री राजेश टोपे यांनी दिली.

राज्यात सध्या ५५ शासकीय आणि ४२ खासगी अशा एकूण ९७ प्रयोगशाळा कोरोना निदानासाठी कार्यरत आहेत. आजपर्यंत पाठविण्यात आलेल्या ६ लाख ६९ हजार ९९४ नमुन्यांपैकी १ लाख १० हजार ७४४ नमुने पॉझिटिव्ह (१६.५२ टक्के) आले आहेत. राज्यात ५ लाख ८९ हजार १५८ लोक होम क्वारंटाईनमध्ये आहेत. राज्यात १५४७ संस्थात्मक क्वारंटाईन सुविधांमध्ये ८० हजार ६७० खाटा उपलब्ध असून सध्या २८ हजार ८४ लोक संस्थात्मक क्वारंटाईनमध्ये आहेत.

ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”