औरंगाबाद – नशा करण्यासाठी जात असलेल्या काही युवकांना वॉचमनने थांबवण्याचा राग आल्याने या युवकांनी वॉचमनलाच बेदम मारहाण केल्याचा प्रकार काल दुपारच्या सुमारास शहरातील टीव्ही सेंटर भागातील नवीन कॉम्प्लेक्स येथे घडला. याप्रकरणी वॉचमनच्या तक्रारीवरून सिडको पोलीस ठाण्यात गुन्हा दाखल करण्यात आला आहे.
या प्रकरणात सिडको पोलिसांनी दिलेल्या माहितीनुसार, टीव्ही सेंटर येथील पोलिस कॉलनी मागे असलेल्या मोकळ्या जागेची देखभाल करण्याचे काम फिरोज खान हे करत असतात. काल दुपारी या ठिकाणी सय्यद नजीर, फिरोज आणि रशीद व अन्य तीन ते चार जण आले. हे सर्व तरुण नशा करण्यासाठी मोकळ्या मैदानात आल्याची चुनचून लागताच वॉचमन फिरोज खान यांनी त्यांना खुल्या जागेत बसण्यासाठी मज्जाव केला. त्याचा राग आल्याने या युवकांनी वॉचमनला बेदम मारहाण केली. या मारहाणीत फिरोज खान हे जखमी झाले. या प्रकरणी सिडको पोलीस ठाण्यात त्यांच्या तक्रारीवरून मारहाण करणाऱ्या पाच ते सहा जणांच्या विरोधात गुन्हा दाखल करण्यात आला आहे.
या प्रकरणानंतर आसपासच्या लोकांनी पोलीस कॉलनी मागील भाग नाल्याच्या परिसरात मोठ्या प्रमाणात नशेखोर मुले बसत असल्याची माहिती दिली. यापूर्वी पोलिसांनी याच भागात कारवाई करून ड्रग्ज विकणार्‍यांना ताब्यात घेतले होते. आताही या भागात अशा प्रकारची अवैध अमली पदार्थ व दारूची विक्री होत असल्याचा आरोप केला जात आहे.